KRALENDIJK – Riba 2 di febrüari 2025 a organisá Ride for the Roses, un evento deportivo ku ta organisá anualmente i ku ta brinda e partisipantenan e chèns pa kana, kore, kore baiskel òf landa. Ku e sèn ku ta generá e organisashon ta sostené e fondo di kanser na Boneiru. E aña aki e asistensia tabata mas grandi ku nunka, ku na tur 1.053 partisipante.

E evento a start eksaktamente 7’or, ora e koredónan di baiskel a sali komo esnan promé. Djis despues e kanadónan i koredónan na pia tambe por a kuminsá ku nan ruta. Alrededor di 75% di e partisipantenan a skohe pa kana òf kore, mientras e otro deportistanan a enfrentá e reto riba baiskel òf den laman. Tambe a partisipá 54 mucha, loke ta enfatisá e aksesibilidat di e evento pa tur edat.

Miembro di direktiva Coen van Gennip ta wak ku satisfakshon bèk riba e edishon aki: “Mi ta kere ku esaki tabata e edishon mas bunita te ku awor. E ambiente tabata sumamente positivo i e sitio tabata perfekto. Tabata e edishon mas mihó bishitá te ku awor i nos tabatin no ménos ku 50 boluntario ku a yuda.”

Eventonan di deporte ta mas popular ku nunka

Ku eventonan deportivo manera Ride for the Roses ta birando mas i mas popular, a sali na kla tambe for di otro eventonan eksitoso na Boneiru. Mester a stòp e e inskripshonnan pa e kareda di Regata 2024, ku Comcabon a organisá,  promé ku ora debí na e kantidat abrumador di inskripshon. Guardian Run di aña pasá tambe a atraé hopi koredó  i kanadó.

Medidanan duradero i kamindanan liber di tráfiko 

Loke a hasi e edishon di Ride for the Roses aki èksta spesial tabata e trato duradero di e organisashon. Riba e ruta di kore a instalá tres pòst pa bebe awa ku kùpnan di karton. Na un manera sabí a minimalisá sushi: 50 meter despues di e pòst tabatin un boluntario pará kla ku un saku di sushi pa tuma e kùpnan. Asina e naturalesa a keda limpi – un manera di trata ku no a apliká promé ainda na Boneiru.

Na kantu di e ruta tabatin vários boluntario ku bandera pa mustra e deportistanan e kaminda korekto. Tambe kayanan tabata ketu riba djadumingu mainta, di moda ku e partisipantenan por a hasi nan deporte sin molèster di tráfiko. E konsepto aki, kaminda ta hasi kamindanan temporalmente liber pa deportistanan, ta usual kaba riba djadumingu na paisnan manera Colombia. Tráfiko di karetera tabata uza e kamindanan ainda na Boneiru, pero riba djadumingu mainta esei tabata minimal.

Plannan pa futuro: Ride for the Roses 2026

Ainda no ta konosí kuantu sèn a rekoudá. E organisashon mester konta esaki ainda. Na 2026 Ride for the Roses ta selebrá su di 10 edishon. E organisashon a duna di konosé ku nan ta buskando miembro di direktiva nobo pa hasi e aña di hubileo aki un éksito aun mas grandi. Ta hasi un invitashon na interesadonan pa kontribuí na kresementu di e evento kresiente aki.