Awor ku nos a  yega fin di aña 2024, mi kier a dediká e edishon aki na e klase trahadó ku a komprondé e lucha sindikal i ku a forma parti di e famia sindikal den 2024. Bira miembro di un sindikato ta un eskoho hopi konsiente. Konsiente na promé lugá pasobra e trahadó ta hasi uso di un derecho fundamental universal humano ankrá den artíkulo 8 di nos konstitushon. Un libertat ku e no mester pidi pèrmit na ningun hende pa ehersé. E libertat aki huntu ku otro libertatnan fundamental manera libertat di ekspreshon, di religion, di move , di eligí i di ser eligí ta ankrá riba artikulo 1 di konstitushon ku ta deklará nos tur komo igual pa lei. Nan ta forma e fundeshi di nos estado di derecho demokrátiko. Ta derechonan ku a eksigí hopi lucha i sakrifisio i hasta sakrifisio di bida di hende pa por a logra nan. P’esei nos mester ta i keda konsiente i alerta ku nos mester defendé e derechonan aki ku alma i kurpa i ku nos mester ta alerta pa forsanan negativo ku lo keda trata pa limitá i te hasta si por eliminá e derechonan aki.

Ta p’esei mi a konsiderá e edishon di fin di aña aki apropiá pa mi ilustrá ki bendishonnan ser miembro di un sindikato ta enserá. Ohalá e bendishonnan aki por ta motibu i argumentunan bálido pa abo ku no ta miembro ainda den 2025 bira miembro i stimulá otro kompañeronan pa sigui bo ehèmpel. Ata e bendishonnanpa trtahadonan sindikalisá.

• Un salario husto basá riba e funshon ku bo ta ehersé i na kua ta mara un salario mínimo i un salario máksimo, esta bo posibilidat pa krese bai ariba den bo funshon, pero tambe e posibilidat pa bo promové bai un posishon mas haltu den e empresa. Tur esaki dependiendo totalmente di bo esfuersonan, bo motivashon personal. 
• Adaptashon di bo salario na oumento di kosto di bida di moda ku bo ta mantené bo forsa di kompra.
• Oumento salarial pa kada aña di e CAO.
• Un kompensashon di fakansi di 8.33% ku ta meskos ku un luna èkstra di salario
• Un bonus di Pasku kual ta meskos ku un luna èkstra di salario. Pues den un aña di 12 luna, bo ta haña 14 luna di salario.
• E montante ku bo tin ku paga belasten riba dje ta 14 luna di salario kitando e suma ku legalmente bo ta liber di belasten i si bo entrada anual no ta pasa 75 mil dòlar bo ta paga 30.4% di belasten i punto.
• Averahe di 20 dia di vakashon pa aña huntu ku 12 dia ofishal liber pa aña mas 52 djasabra i 52 djadumingo. Pues un total di 136 dia ku ta kasi 4 luna i mei pa aña ku bo no mester traha(tempu di katibu ta 7 dia pa siman 52 siman largu), Antó banda di esakinan bo tin tambe ainda dianan liber speshal pa nasementu, kasamentu, ora hende muri, pasa èksamen, aña kasá, pa malesa di yu i/o hende yegá, pa kompañá hende malu, ets, ets.
• Seguro pa esnan ku koeda atras ora bo muri morto natural òf morto di desgrasia na trabou.
• Na hopi kompania pago di 100% di bo salario na ora di malesa.
• Pago èkstra riba kumplimenu di aña di servisio.
• Pago di overtaim, dependiendo di e dia ku bo traha overtaim òf dia liber
• Pago di oranan irregular si bo ta trahadó di warda.
• Kompensashon pa trabou peligroso
• Fondo di Spar
• Fondo di Penshun. 
• Kuminda ora di traha overtaim
• Transporte pagá
• Akuerdo laboral bon deskribí ku kondishonnan bon deskribí kon por straf un trahadó te kon por retirá un trahadó.

Tin mas kondishonnan chikitu ku mi no a menshoná.  Tur esakinan mi ta konta komo bendishonnan material ku esnan ku no ta miembro no ta gosa. di dje. I no mester lubidá ku sindikato ta lucha tambe pa bo sirkumstansianan na trabou ta di akuerdo ku kriterianan internashonal, manera seguridat i higiena na trabou, sirkumstansianan bon pa bo salú mental i físiko i ku tin reglanan kla pa evitá komportashon indeseá na trabou entre koleganan ma prinsipalmente entre esnan ku poder pa esakinan no malusá e poder aki kontra e trahadó.

I banda di tur esakinan ser miembro di un sindikato ta ofresebo yudansa i asistensia den diferente kaso ku bo por hañabo aden, esta di skuchabo òf skibi un karta te paga un abogado si bo mester bai den korte pa defendé bo derechonan. E sindikato ta sera akuerdo ku diferente empresa ku ta ofresé un deskuento ora bo mustra ku bo ta miembro di e sindikato. Tambe sindikato ta organisá nochinan di informashon pa yudabo enrikesé bo konosementu i desaroyo personal. Tur esakinan mi ta konta komo bendishonnan ku esnan ku no ta miembro no ta gosa di dje. Mi kier sera e edishon speshal aki ku dos pregunta fundamental.

1. Kiko ta stroba abo ku no ta miembro ainda pa bira miembro mas lihé posibel?
2. Kon fuerte abo ku ta miembro ta pa sigui den UNION i SOLIDARIDAT pa nos defendé e derechonan aki kontra kualkier intento i forsa pa limitá i/o eliminá nan i ki aporte lo bo duna pa sigui mehorá kondishonnan laboral?