Nòchi Willem, konsehero di Union Sindikal Boneriano, USIBO

Si sindikalismo kier sigui hunga e ròl importante den e desaroyo sosial-ekonómiko di Boneiru i si sindikalismo kier sigui gosa di e rèspèt i rekonosiemtnu komo partner igual den e desaroyo aki, sindikalismo lo mester asumi sierto responsabilidat interno di hopi importansia.

Mester na promé lugá tuma e paso pa profeshonalisá sindikalismo i no por sigui riba e base di boluntarismo. E forma mas adekuá pa profeshonalisá sindikalismo riba nos isla ta formashon di nos lidernan sindikal. I den esaki mi ta referí na promé lugá na formashon di nos shòpstewardnan den e diferente kompanianan kaminda a rekonosé sindikato komo partner di negosashon pa loke ta trata kondishonnan i tambe sirkumstansianan laboral di e trahadó.

Ku koperashon di e dunadó di trabou sindikalimso mester por traha un programa di formashon di henter aña, kaminda ta bai subi nivel di e shòpstewardnan tantu pa loke ta nan konosementu komo nan abilidat di funshoná. E shòpstewardnan ta bai ta e kurason di e sindikato. Den e kuadro aki, mi ta sumamente orguyoso di por a kontribuí na e proseso aki den e sindikato AFBW, kual sindikato a tuma e reto pa reorganisá su mes bou di e konsepto nobo aki.

Energia, tempu i fondo lo bai ta e pilarnan pa karga e desaroyo nobo ku ta bai drenta aki. Riba base di boluntarismo nos a karga AFBW for di 2019 te ku awe ku e resultado positivo ku e sindikato ta representá trahadornan na 20 kompania ku un kantidat di kasi 900 miembronan afiliá. Tur hende ku dos plaka di sintí ta realisá ku pa sigui karga e organisashon aki, no por sigui riba un base boluntario so. P”esei reunion general di miembornan lo mester bai duna aprobashon na e direktiva pa entamá e proseso di e kambio fundamental aki. Esaki mester bira un di enkargonan konkreto den e plan di e sindikato pa e aña aki.

Nos lo t’ei pa duna konseho a base di nos eksperensha i konosementu, pero e trabou mes lo mester ser kargá pa e generashon hóben. E desaroyo aki no solamente lo ta benefisioso pa sindikalismo, sino e lo ta di un balor agregá enorme pa henter e desaroyo sosial-ekonómiko di nos isla.

Huntu ku gobièrnu i sektor empresarial, nos lo por karga i garantisá un desaroyo sosial-ekonómiko duradero, sostenibel i balansá den kual e prosperidat lo ser repartí den un forma husto riba henter e komunidat. Nos ta sumamente kontentu ku un mas di nos idealnan a haña sosten i ku nos por koperá pa realisá esaki.

Pa loke ta UNION SINDIKAL BONERIANO, USIBO, tambe mi tin un mensahe di aña. USIBO a komprometé su mes pa kumpli ku un di e resolushonnan di ILO, esta perkurá pa tin un plaraforma tripartit pa karga desaroyo sosial ekonómiko di nos isla. Pa loke ta trata e aspekto aki, mi ta invitá USIBO pa huntu ban realisá e siguiente puntonan i pone nan komo punto di lanse pa e progama di aña 2025, nan ta

1. Huntu ku sektor empresarial en general, pero en partikular esnan den industria turístiko yega na un akuerdo pa un kontrakto laboral básiko pa henter e sektor, primeramente riba un base boluntario, pero si ta neseario usando e lei di “verbindend verklaring” pa e sektor. Opviamente tin mas sektor ku ta grita pa un kontrakto kolektivo laboral básiko, manera entre otro e sektor di seguridat, e sektor di konstrukshon i e sektor di pakusnan. A proba ku un kontrakto asina ta posibel, realisabel i benefisioso pa tur partido. Tur hende ku ta interesá por tuma nota di esaki pa loke ta e sektor di kuido ku hasta a surpasá frontera di Boneiru i a konta pa Saba i Statia.
2. A yega momento pa polítika i USIBO sinta huntu pa traha un plan pa yega na entrodukshon di un fondo di penshun general. Esaki ta un tema ku tur partido ku a partisipá den e último elekshon a kore kampaña kuné. A yega e ora pa manera merikano ta bisa “Put the money where your mouth is”. Esta kumpli ku loke bo a primintí.

Komo klase trahadó nos tin un kompromiso ku otro. AWOR MAS KU NUNKA UNION LO HASI FORSA. Uni bo mes sin miedo i lo bo disfruta benefisio di bo sakrifisio.