Dia di Labor manera tur aña lo ta dia 1 di mei 2025. Na 2012 lidernan sindikal di tur sindikato aki na Boneiru huntu ku e presidente di UPAH a realisá ku e Dia di Labor ta internashonalmente e dia rekonosé pa trahadónan rònt mundo rekordá e lucha noble pa liberá i emansipá e klase trahadó for di abuso i eksplotashon. Un lucha ku a resultá den dramamentu di sanger i hasta pèrdida di bida di lidernan sindikal.

Un lucha pues pa abo trahadó ku awe na 2025 por gosa di kondishonnnan laboral faborabel ankrá por parti den nos leinan laboral i por parti ankrá den kontraktonan kolektivo, CAO, ku sindikatonan ta negoshá ku dunadónan di trabou, kaminda e trahadónan ta organisá den un sindikato. E lucha no a kaba ainda. E lucha tin dos kara. Uno ta konservá e logronan pa nan no bai pèrdí. E otro ta pa mehorá e kondishonnan i mui en espeshal e retonan ku ta pone preshon sosial-sigiko riba e trahadó su salú fisiko i mental, e asina yamá burn-out. Nos ta na 3 febrüari, pues mas o ménos 3 luna for di 1 di mei DIA DI LABOR. I komo mi a tuma nota ku 2 aña tras di otro USIBO e UNION SINDIKAL BONERIANO no a organisá nada riba e dia ei, mi a disidí bati bèl tempran. Un yamada na tur sindikato i nan liderato pa pone e kousa dulanti, bin huntu for di awor, forma un komishon entre tur e sindikatonan i traha un plan pa dia 1 di mei 2025 kompañá pa un presupuesto finansiero. Mi kier pidi USIBO tuma e inisiativa i tene komunidat trahadó na altura di e desaroyonan for di e momento di invitashon pa organisá te ku e programa riba e Dia di Labor 1 di mei. Pues e aña aki tin selebrashon di Dia di Labor, no tin diskushon.

Pago di Dianan di Malesa

Sindikalismo a risibi keho ku tin dunadó di trabou ku ta apliká e lei di pago pa dianan di malesa di un trahadó kompletamente robes. E trahadó tin e obligashon pa for di e promé dia informá su dunadó di trabou ku pa motibu di malesa e lo no presentá na trabou. E dunadó di trabou na su turno mesora mester mèldu esaki via  “portal” na Unidat di Asuntunan Sosial i Labor. E “portal” ta un sistema online via kòmpiuter. Pues no tin asuntu di karchi geel ni ku bo mester bai dòkter di kas pa buska un papel. Si bo malesa dura tres dia o mas, lo bo risibi un yamada dòkter di seguro ku sea telefónikamente òf ku un chekeo físiko lo determiná pa deklará ku bo ta inkapasitá pa traha i pa kuantu dia. E deklarashon di e dòkter di kas ei ta determiná ku bo dunadó di trabou lo risibí 80% di bo salario for di e promé dia ku bo a mèldu ku bo ta malu. Bo dunadó di trabou tin e obligashon di pagabo bo salario kompleto i no por skonde tras di e echo ku e no a risibí su sèn ainda di Banko Sosial. Pa lei bo dunadó di trabou mester pagabo minimal 80% di bo salario tur e dianan ku bo tabata malu na kas. Hopi biaha den CAO ta negoshá pa e dunadó di trabou paga e 20% riba e 80% i asina kompletá 100% di bo salario. Otro bentaha pa abo ta miembro di un sindikato. Pero hamas e dunadó di trabou por keda sin pagabo e dianan ku bo a mèldu malu. 

Djarason awor trahadónan di Contour Global lo bai referèndem pa indiká ku nan kier pa AFBW ta nan representante legal pa sinta na mesa i negoshá un CAO pa nan ku gerensia di Contour Global. Un yamada, boso partisipá 100% na e referèndem pa manda un señal kla i raspá na gerensia pa duna rèspèt i rekonosimemntu na e sindikato. Kòrda ku ta BO derecho bo ta bai ehersé entre 13.00 pa 18.00. Bo dunadó di trabou pa lei mester dunabo e oportunidat pa hasi uso di bo derecho.