KRALENDIJK- Kasi dos aña pasá Tera Barra a organisá un akshon go-fund me (plataforma pa rekoudá fondo)pa kolektá sèn pa un mashin di desintegrá palu fini fini. Danki na e generosidat di algun donatùr grandi i hopi donatùr chikitu ku por a kumpra e mashin.

Mientrastantu e organisashon tin un reto nobo. “Danki na e mashin di desintegrá palu fini fini nos por a traha mientrastantu un stòk konsiderabel di kòmpòst di sushi di kurá”, Johan Blerk di e organisashon ta bisa den un kòmbersashon ku Bonaire.nu. “Pero awor e siguiente reto ta bini, esta planta di un forma efektivo e miles di palunan, ku mientrastantu a kultivá, den  naturalesa di e isla”.

Blerk ta mustra riba un echo ku kada ken ku gusta hortikultura na Boneiru konosé: Koba buraku pa planta palu òf mata ta kasi imposibel den e suela di klep duru. “Pues awor nos ta buskando e sèn nesesario pa por kumpra un mini-mashin di koba buraku ya asina nos por koba na gran eskala e burakunan nesesario pa planta e palunan aden”.

Subasta 

Pa por rekoudá sèn pa kumpra un mini-mashin di kobra buraku, ku ta hasi plantamentu muchu mas fásil, Tera Barra ta organisá djasabra awor un findishi, kaminda ta subastá diferente produkto, ku ta varia di ophetonan di arte, produktonan di naturalesa, pero tambe por ehèmpel ekskurshonnan òf estadianan na hotèl.

Donatùrnan ku ta físikamente riba e isla por buska un karchi di entrada pa un sena kombiná ku e subasta. Por haña karchi te ku awe, djabièrnè, na Harbourtown Real Estate, mientras e karchinan di entrada ta optenibel te ku mañan, djasabra, na Tera Barra mes.

Tambe interesadonan pafó di e isla por hasi un oferta awor via e Página di Facebook di Tera Barra riba e enorme kantidat di kos ku lo bai subastá.

Spektakular

Apesar di e trabou ku e ta hasi pa añanan kaba huntu ku un grupo di boluntario, ora ta trata di sembra, kuida palu i traha kòmpòst, van Blerk no ta ménos entusiasmá ora ta trata di lantamentu di e fundashon pa reforestá.