KRALENDIJK- Awe Wibo de Vries, direktor di Instituto Hudisial Hulanda Karibense (JICN), a habri e tienda interno “Toko Leny” di forma ofisial. Karel Martis a inisiá e proyekto aki, kende ku su dedikashon a hasi realisashon di e tienda aki posibel.

‘Toko Leny’ no ta ofresé detenidonan solamente e posibilidat pa kumpra produktonan esensial, pero tambe pa kontribuí aktivamente na trabounan diario den e tienda. Nan ta yuda ku tareanan manera paketá merkansia, yena rèki i manehá e stòk. Sinembargo e trabou di kaha ta keda reservá pa e personal di e tienda.

Ademas di e enfoke riba detenidonan e tienda riba inisiativa di direktor Wibo de Vries ta hunga un ròl importante den retenshon di empleadonan eksperensiá.  E tienda tambe ta ofresé lugá di trabou na empleadonan di mas edat ku ya no por partisipá kompletamente den tur e trabounan regular mas. E ‘lugánan protehá’ aki ta duna nan e oportunidat pa por sigui ku nan karera na un manera digno.

Na e momentunan aki tin 3 ‘kwartiermakers’ pa hasi e tienda operashonal. Si tur kos kana bon, lo saka vakatura pa sigui yena e lugánan di trabou. ‘Toko Leny’ tin un funshon edukativo i rehabilitativo importante. Detenidonan ta siña tuma responsabilidat, plania i traha ku reglanan kla. Esaki ta prepará nan pa un regreso eksitoso den komunidat.

Pa tene e tienda seif i respetuoso, tin reglanan estrikto. Artíkulonan intoksikante, inmoral, probokante i blasfemoso ta prohibí.

Posibilidat

Ku apertura di ‘Toko Leny’ ta dal un paso importante. Danki na esfuerso di Karel Martis i inisiativa di direktor Wibo de Vries e tienda ta ofresé posibilidat tantu na detenido komo empleadonan. E proyekto ta duna un bista kon rehabilitashon i retenshon di empleadonan por kana man den man.