KRALENDIJK- Despues di un keho tokante e preis di e lionfishburger na Cactus Blue, Fundashon Tienda pa Konsumidó Boneriano a hasi un investigashon riba e preis di e plato aki. Cactus Blue, un truk di kuminda konosí na Boneiru, ta sirbi kuminda ku lionfish, un tipo di piska invasivo ku ta dañino pa nos ekosistema lokal. Komiendo lionfish ta yuda kontrolá e espesie aki i protehá nos refnan di koral.

E lionfishburger na Cactus Blue ta kosta alrededor di 26 dòler. Esaki ta ménos ku e preis di platonan di lionfish den restorantnan na Boneiru, kaminda normalmente nan ta kosta entre 32 i 38 dòler. Sinembargo, e preis ta parse haltu pa un truk di kuminda, kaminda gastunan operashonal normalmente ta mas abou. Un burger regular di piska ta hopi mas barata.

E preis haltu ta debí na e kosto di lionfish mes. Lionfish limpiá na Boneiru ta kosta mínimo 50 dòler pa kilo i por yega te 60 dòler pa kilo. E kaptura i prosesamentu ta eksigí hopi trabou pa motibu di e spiñanan venenoso i e método spesial pa kapturá nan. Tambe tin skarsedat di lionfish, loke ta subi e preis mas ainda.

Segun FTPKB, Cactus Blue ta menshoná riba nan bòrchi di menú ku e preis ta dependé di e “preis di merkado” i ta duna klientenan splikashon verbal kon e preis ta wòrdu kalkulá. Pa klientenan di islanan den besindario, manera Aruba i Kòrsou, kaminda un plato similar di lionfish ta kosta alrededor di 19 florin antiyano, e preis na Cactus Blue por bini komo un sorpresa. Esaki por ta konfuso, spesialmente si e preis no ta keda menshoná klaramente riba e menú. Splikashon verbal por bai pèrdí pa motibu di zonido di ambiente òf falta di atenshon di e kliente.

Chef Tham

Chef Tham, doño di Cactus Blue, ta enfatisá ku e truk di kuminda ta sirbi solamente un plato ku lionfish, huntu ku dies otro plato di karni, galiña i opshonnan vegetariano. “Lionfish ta un produkto karu pa kumpra i difísil pa prepará, p’esei e ta karu pa bende,” e ta splika.

Cactus Blue a skohe konsientemente pa sigui sirbi lionfish, apesar di e kostonan haltu i e disponibilidat limitá. “Ta importante pa sigui kombatí e espesie invasivo aki, pasobra e ta un menasa grandi pa nos diversidat di piska i refnan di koral,” segun Chef Tham. 

E ta agregá ku Cactus Blue ta e úniko lugá ku ta sirbi lionfish tur dia pa mas ku ocho aña kaba. “Asta ku un tim di 25 kasadó di lionfish, e kantidat di kaptura ta limitá, i lionfishnan grandi adulto ta eksepshonal.” Pa informá klientenan bon, e tim di Cactus Blue ta duna splikashon amplio tokante e preis i e historia di lionfish. Ademas, tin informashon riba e bòrchi di menú i rondó di e vehíkulonan tokante lionfish i e menasa ku e espesie aki ta forma pa e refnan.

Rekomendashon

Pa evitá malentendimentu, Tienda pa Konsumidó a informá e truk di kuminda pa pone un rango di preis kla riba e menú, ku un splikashon ku e preis por varia dependiendo di e preis di dia di e kaptura. Esaki ta evitá konfushon i ta duna mas transparensia na e konsumidó. 

“Un indikashon di preis korekto i kla ta esensial pa transparensia di merkado i ta un rekisito legal. Preis ta un di e faktornan mas importante pa konsumidónan den nan desishon di kompra. P’esei ta importante pa klientenan wòrdu informá bon i visibel di antemano tokante e gastunan”, asina FTPKB ta konkluí.