KRALENDIJK- E ekipo di futbòl Vespo durante fin di siman ku a pasa a gana Real Rincon ku skor di 4 pa 3. E partido a finalisá sero i a sigui ku pinalti pa yega na un ganadó. Aki Vespo a skor nèt 1 gol mas ku Real Rincon, asina sali envikto di e wega.

E partido tabata un deseo di Chio Mercera, kende a hunga den ámbos partido di e bario di Rincon. Den kuadro di selebrashon di su 80 aña di bida, el a hasi posibel pa e enkuentro tuma lugá. Ya pa un tempu largu el a hasi petishon na ámbos ekipo, pa nan enfrentá otro i esei a sosodé djasabra 20 di aprel. E partido a tuma lugá na vèlt pariba.

E enkuentro a karga e nòmber ‘Kopa Chio Mercera’. Durante e anochi, tabatin mas enkuentro riba e vèlt, di otro ekiponan di futbòl veterano. Por a tuma nota di un kantidat bon di fanátiko presente pa sigui e weganan. Na final di e partido entre Vespo i Real Rincon, Chio su nietu Sufarno, a entrega e trofeo na Vespo.

Di e manera aki Chio a kumpli ku un deseo grandi ku e tabatin. Ta notabel ámbos ekipo ta fuerte.