KRALENDIJK – Podisé riba papel e ta na e momentonan aki e mihó windsùrfista ku Boneiru tin. Sinembargo aña 2024 tabata un aña agitá pa e konosido windsùrfista Boneriano Amado Vrieswijk. “Mirando atras, si mi wak e resultadonan, mi no ta satisfecho,” Vrieswijk ta bisa. Tòg e no ta desanimá, e tin un spònser nobo  i e ta ansioso pa un temporada nobo ku oportunidatnan nobo.

Vrieswijk su aña a kuminsá tempran den 2024. Na luna di yanüari el a sali pa entrenamentu na Lanzarote, sigui pa seshonnan intensivo riba e isla Tenerife. El a biaha rònt mundu. Di Mayorca, pa Alemania i Hapon, kaminda el a partisipá na kompetensianan prestigioso. Apesar di su skema kargá, e aña no a bai manera el a plania. “Mi a haña corona na Kopa Mundial na Poso. Esaki tabata pisá. Na Poso e kondishonnan klimatológiko ta esun mas ekstremo pa un windsùrfista. Tin olanan grandi i bientu ta supla duru. Pa motibu di corona mi no tabatin un bon komienso di mi temporada,” segun Vrieswijk. Sinembargo su malesa no a strob’é pa perseverá i na Alemania el a logra optené e título IFCA, apesar ku e tabata rekuperando ainda.

E aña no tabata solamente físikamente difísil, pero tambe téknikamente. Vrieswijk ta splika kon importante ta pa dispone di e ekipo korekto. “Tèstmentu di ekiponan ta tuma hopi tempu,” e ta bisa. Esaki a pone tambe ku pa Vrieswijk su sentimentu e no tabatin e mihó ekipo. Ta parse ku su kontrinkantenan tabata optené na diferente Kopa Mundial nèt nèt un bentaha. “Pero otro aña esaki lo ta diferente. Mi tin un spònser nobo. Ku nan mi ta kere ku mi por sera e buraka ku e tòp apsoluto i tin mas chèns riba e títulonan,” segun un Vrieswijk visiblemente motivá.

E Deseo pa mehorá

Vrieswijk su dedikashon na su deporte ta inkomparabel. E ta desidido pa mehorá su prestashonnan i alkansá su metanan. Ku e perspektiva di un spònser nobo e ta mira e aña benidero komo un oportunidat pa konkistá e título mundial riba foil. “Mi ke simplemente optené e título ei,” e ta bisa desidido. Apesar di su edat un tiki mas grandi e ta konvensí ku e por mantené e ritmo di e generashon mas hóben. “Mateo ku a yega na di tres lugá tin trintiseis aña. Si bo tin plaser i no ta haña leshonnan parotin, bo por partisipá pa tempu largu.”

Futuro na Boneiru

Apesar ku Vrieswijk ta pasa hopi tempu den eksterior, Boneiru ta keda un lugá spesial pa Vrieswijk. “Na Boneiru bo no tin niun hende di mi nivel pa praktiká kuné,” e ta splika. Sinembargo Vrieswijk ta bolbe tur aña pa wak su famia i amigunan. Tambe e ta inspirá e generashon mas hóben di winfsùrf ku su presensia. “Nos ta purba di yuda e muchanan akinan. Banda di esei mi ta entrená nan un tiki pa stimulá e foil di IQ pa hubentut akinan,” e ta bisa. Ku su eksperensia i ekspertisio e ta spera di inspirá i guia un generashon nobo di windsùrfista.

Un komienso nobo

E aña benidero pues Vrieswijk lo bai nabegá ku un otro marka, lokual ta dun’é e energia i e motivashon nobo. “E ta simplemente algu fresku, algu nobo ku ta duna mas motivashon,” e ta bisa. Su enfoke ta riba mehorá su téknika i optimalisá su ekipo. “Mi tin awor e potensia ku mi tabata buskando i esei ta importante,” e ta splika.

Vrieswijk su pashon pa windsùrf ta kontagioso. E ta mira su deporte di windfoil komo e Formula 1 di awa. “E ta puru ekstremo,” e ta bisa di e adrenalina i rapides ku ta involukrá ku windsùrf. “Mi ta keda un ratu mas na Boneiru pa praktiká, pero pronto mi ta biaha atrobe. Mi ta ansioso pa e temporada nobo.”