Riba djasabra atardi algu despues di 3 ‘or e promé avion nobo di Z Air, di e tipo Embraer 140 a baha riba pista di aeropuerto di Kòrsou.

Un grupo di empleado di Z Air tabata presente riba e plataforma pa risibí e avion nobo, ku ta konta ku 44 stul. E avion ta un paso importante pa Z Air, pa motibu ku e avionnan Embraer ta karga 44 pasahero i, ku esaki, nan ta bira e avion mas grandi den e flota di Z Air. Pero importante tambe, pasombra e avion lo hasi posibel pa Z Air por bula mas lihé i por yega destinashonnan mas leu.

Konkretamente lo kuminsá ku buelonan pa Medellín i tambe St. Maarten usando e avion djèt aki. Banda di esei lo bini ku destinashonnan nobo, ku lo keda sirbí pa e Embraer 140.

Kontentu

Doño di Z Air, René Winkel a mustra su mes hopi kontentu ku yegada di e promé avion. Segun Winkel a splika, tabata tin hopi trabou tras di kòrtina prome ku e avion por a yega Kòrsou awe. Mientrastantu ya tin un promé grupo di piloto ku a hasi nan treinen riba e avion aki kaba, pa nan por piloteá esaki asina ku e avion ta kla pa drenta servisio.