SANTA DOMINGO – Repúblika Dominikano ta entregá e Hulandes Terence de Vries na Hulanda, manera Korte Supremo a disidí e siman aki den e pais ei. Hulanda ta buska De Vries pa motibu di su kondena di korte na Amsterdam pa trafikashon di droga.

Na 2018 korte di hustisia a sentensiá De Vries na 5,5 aña di prizòn i na 2019 a konfirmá e kastigu aki despues di kasashon den Korte Supremo. E tempu ei De Vries tabata fugitivo i tabata busk’é na Sürnam pa motibu di su embolbimentu den un tiroteo mortal.

Durante su tratamentu dilanti korte a lagu’é den libertat en espera di su proseso penal. Mas despues hustisia Hulandes a deskubrí ku tabata buska De Vries na Sürnam pa asesinato i ku e tabata riba e lista di esnan mas buská di Interpol. Pa motibu di un eror no a ripará esaki na momentu di su detenshon.

For di luna di aprel di e aña aki De Vries ta detené na Repúblika Dominikano. El a skohe pa un prosedimentu aselerá pa ekstradishon.

Na luna di aprel a detené De Vries huntu ku e Hulandesnan Dennis Goedee i Urvin ‘Nuto’ Wawoe. Ta konsiderá Wawoe komo un lider dentro di e organisashon kriminal No Limit Soldiers di Kòrsou i ta busk’é entre otro pa dunamentu di enkargo pa likidashonnan.

Hulanda ta buska Dennis Goedee pa motibu di trafikashon internashonal di kokaina. Pero ta asosi’é tambe ku menasanan den direkshon di miembronan di Kas Real Hulandes, entre kua prinsesa Amalia.