SAN SALVADOR – E tim di futbòl Boneriano ta hunga e dianan benidero su último wega pa Liga di Nashonnan. Na siudat San Salvador e ta hunga promé kontra El Salvador. Tres dia despues Saint Vincent & Grenadines ta riba programa. Segun kapitan Marshelon Pourier tin hopi kos den wega. E meta grandi ta mantené e puesto  den Liga B pero ketu ketu ta wak tambe promoshon pa Liga A.

“For di prinsipio di Liga di Nashonnan nos a pone un meta kla nos dilanti,” Pourier ta bisa. “Mantené Liga B ta nos meta prinsipal, pero si nos por sali na di dos lugá i kalifiká pa e ronda preliminar di Gold Cup, esei lo ta un prestashon fantástiko.” Despues di kuater wega hungá Boneiru ta pará na di tres lugá. Na tur nan tin kuater punto. El Salvador ta na kabes, nan tin nuebe punto. Saint Vincent & Grenadines tin shete punto. Montserrat ta na di último lugá i tin tres punto. 

Adaptá strategia 

Por sinti e tenshon den e pul despues di nan viktoria resien di 1-0 kontra Montserrat. Tabata e promé viktoria pa Boneiru den Liga B di Liga di Nashonnan. Ku e viktoria aki e ekipo ta parse di ta bai ku hopi konfiansa kontra e siguiente oponente. Kapitan Pourier ta enfatisá e nesesidat di un aserkamentu táktiko fuerte pa e siguiente wega kontra El Salvador.  “Awe nochi nos ta hunga kontra El Salvador, kontra ken nos a hunga kaba i nos sa kon nan ta operá. Mi ta haña ku nan tin un tim fuerte ku spesialmente ta bon den defensa. Ta importante pa nos adaptá nos strategia i purba di haña tres punto. Biaha pasá e no a logra,”

Mas kalidat na Boneiru 

E tim di Boneiru a buk un adelanto signivikativo aña pasa segun e Kapitan. “For di momento di nos promoshon pa Liga B aña pasá, nos a dal stapnan grandi.” Pourier ta splika. “A drenta mas kalidat den e selekshon i nos a bira un tim mas uní.”

Komo Kapitan Pourier ta hunga un ròl krusial den trese un tim huntu di kua e hungadónan ta plamá na diferente parti di mundu. “Ta un reto pa haña tur hende riba un liña, spesialmente pasobra hopi di nos hungadónan ta hunga futbòl den eksterior, manera mi mes na Hulanda. Pero e laso ku nos a konstruí ta fuerte i ta yuda nos enormemente.”

E promé wega di Boneiru kontra El Salvador ta tuma lugá awe nochi, siguí pa un enkuentro riba djadumingu ku Saint Vincent & Grenadines. Si Boneiru gana dos biaha, promoshon dirèkt pa Liga A lo ta posibel. Pourier ta wak futuro ku konfiansa: “Promoshon pa Liga A lo ta fantástiko, pero nos mester konsentrá promé riba e retonan di awe.”