KRALENDIJK- A resultá ku Boneiru, St. Eustatius i Saba, kisas kontra tur espektativa na prinsipio, tabata eksitoso den nan defensa kontra e plannan di impuesto proponé ku a presentá den e Lei di Impuesto BES 2025.

A aseptá djaweps un modifikashon, ku ChristenUnie, Groen Links i D66 a entregá pa no implementá e diferente medidanan di impuesto, apesar di un konseho motivá di minister di finansas Eelco Heinen pa no hasi esei. 

E Plan di Impuesto original tabata kontené un oumento struktural di e suma liber di impuesto pa tur entrada. E intenshon tabata sinembargo pa hasi solamente algu pa tur entrada ku realmente mester di esei. P’esei komo kompensashon a proponé banda di esei un seri di medida ku ta oumentá  e karga pa eliminá e benefisio no deseá atrobe for di e entradanan haltu. Pero parse ku e oumentonan di impuesto ei ta mishi ku kasnan di famia tambe ku ta gana ménos ku Nibud a kalkulá den kuadro di e rapòrt ‘Un eksistensia digno’ di komishon Thodé tokante e problemátika di pobresa.

E islanan a ekspresá ademas preukupashon pa loke ta trata e medidanan eksesivo stap pa stap pa sektor hotelero i a mustra ku e oumento proponé di impuesto riba ganashi ta mishi tambe ku empresanan chikí ku un B.V./N.V. ku ta traha huntu den nan propio empresa, manera trahadónan di limpiesa i hardineronan ku un òf algun trahadó.

Kiebro ku tendensia 

Miembro di Kiescollege i eksperto riba tereno di impuesto Jaap Kos, ku a komprometé su mes intensivamente e último lunanan ku e asuntu aki, ta kontentu ku e akshon di e partidonan polítiko na Den Haag i e éksito optené.

“Esaki ta un kiebro ku tendensia di pasado, asta si inesperadamente no aseptá e modifikashon. E tempu ku ta atendé Lei di Impuesto pa Karibe Hulandes na Den Haag komo ‘hamerstuk’ (un punto di agènda ku no ta diskutí riba dje durante un reunion i ku ta aseptá sin votashon) a pasa definitivamente pa olvido. Ku esaki e miembronan di kamer ta demostrá ku e bos di pueblo di Karibe Hulandes ta konta kompleto,” segun Kos.