KRALENDIJK – Kolehio Ehekutivo di e Entidat Públiko Boneiru (OLB) a bolbe nenga un petishon di pèrmit pa konstrukshon di Sunset Beach Resort, ku lo mester bini entre Chogogo Resort i Eden Beach Resort. E desaroyadó for di aña 2021 a entregá diferente petishon kaba, pero ningun di esakinan a risibí aprobashon di OLB te asina leu.

Un apelashon formal kontra di un desishon negativo anterior, tambe a wòrdu rechasá pa motibu ku esaki lo no tabata tin sufisiente base.

Den su karta fechá 28 mei 2024, Kolehio Ehekutivo a duna diferente motibu pa kualnan e petishon aki tampoko no a wòrdu aprobá. E prinsipal motibunan ta ku e desaroyadó ainda ta basa su diseño riba no ménos ku sinku píso, e kantidat di apartamentunan ku segun e petishon lo bai realisá, e falta di lugánan di parker pa un desaroyo asina grandi, i e echo ku e konstrukshon ta bai tin un impakto negativo riba e situashon di tráfiko na e sitio.

Mas chikí

Kolehio Ehekutivo ta informá e desaroyadó ku nan lo kier wak un resòrt hopi mas chikí na e sitio konserní. “Boso ta purba saka e máksimo posibel riba e pida tereneo aki. Esaki ta inkluí un maksimum kantidat di apartamento, e kantidat di piso, uso di dak plat pa no surpasá e alturo máksimo, mínimo distansia permití pa muraya na banda i patras, i e konstrukshon máksiko di kantidat di meter kuadrá, i tambe e porsentahe ku ta pèrmiti di konstruí riba un tereno di un grandura manera esaki,” OLB ta skibi den su karta na Resort Bonaire.

Mas leu den e karta ku tin ma tir seis página, OLB ta skibi: “Nos ta di opinion ku e magnitut di proyekto lo tin ku keda redusí konsiderabelmente, pa evidat peliger pa tráfiko, moveshon liber di trafiko i evitá pa e proyekto por kousa molèster pa otro proyekto den bisindario.”

E kompania ku a pidi e pèrmit ta liber pa bolbe apelá e desishon di Kolegio Ehekutivo, pero ta parse improbabel ku algu lo sali afó.