KRALENDIJK – Dia 19 di òktober 2021 Tourism Corporation Bonaire (TCB) a bishitá diferente skol básiko na nos isla pa entregá e buki nobo di turismo titulá “Turismo na Boneiru, un Eksperensia Outéntiko” na e muchanan di grupo 5 te ku 8.

Esaki ta e di tres edishon di e buki di turismo ‘Turismo na Boneiru’ ku TCB a produsí den koperashon ku e outor lokal Denise de Jongh-Rekwest. Enseñansa ta esensial i pa e motibu akí TCB ke sigui invertí den nos kuríkulo di skol pa medio di pone buki relatá na turismo i material pa lesa disponibel.

Diputado di turismo sr Hennyson Thielman a djòin CEO di TCB, Miles Mercera i Miss Turismo Boneiru Sunniva Manuel pa hasi entrega di e promé ehemplarnan di e buki na direktor di kada skol básiko. 

E buki akí ta un medio fantástiko pa nos muchanan pa siña mas tokante turismo, nos patrimonio lokal i nos kultura. Nos ta deseá tur nos muchanan hopi plaser ku lesamentu.