A rekonosé trafikashon di droga na Aeropuerto Internashonal Flamingo

Kralendijk – Riba djadumingu 23 di mei a detené dos persona na Aeropuerto Internashonal Flamingo pa sospecho di tin den poseshon i/òf pa trafikashon di supstansia narkótiko. E detenshon a tuma lugá en konekshon ku un kòntròl konhunto di Koninklijke Marechaussee i Duana Hulanda Karibense.

Durante di e kòntròl a kontrolá algun persona dor di hasi uzo di un tèst di urina, loke ta indiká si posiblemente un persona tin droga den su kurpa. Di e personanan kontrolá, dos a tèst positivo. A base di esaki Duana a detené e personanan aki i a pasa nan pa Marechaussee.

Despues di detenshon tur dos sospechoso a koperá ku e kòntròl pa medio di un ‘bodyscan’, ku kua por mira si ta transportá droga den kurpa. Un persona a ser laga den libertat despues di e skèn, e di dos persona a keda den detenshon en espera di investigashon mas aleu.

Koninklijke Marechaussee i Duana Hulanda Karibense regularmente ta ehekutá kòntròl konhuntu na aeropuerto na Boneiru, ku komo meta identifiká i para kriminalidat ku ta krusa frontera. Koninklijke Marechaussee ta ehekutá e investigashon mas aleu riba enkargo di Ministerio Públiko.

Lesa tambe:

• 
  Rijna: ‘Rònt mundu tin un krísis di awa ta reina’
• 
  TCB, BONHATA i WEB ta introdusí e proyekto di ‘Bonaire Water Bottle’ komo parti di e esfuersonan sostenibel di nos isla
• 
  Prevení Zika, Dengue i Chikungunya |Aviso pagá
• 
  TELBO ta sigui ku aktividat pa selebrá nan 40 aña di eksistensia
• 
  Gezaghèber Rijna na seshon di desayuno di Rei Willem-Alexander