Kralendijk – Gezaghèber Edison Rijna a disidí pa adaptá algun medida for di djabièrnè 13 di ougùstùs te ku djabièrnè 27 di ougùstùs. Por hasi esaki pasobra te ku awor e kantidat di kontagio a keda stabil i pasobra no tin pashènt ku COVID-19 den hòspital.

Departamento di Salubridat Públiko tin mayoria fuente di kontagio bon na bista. Den mayoria kaso ta trata di kontagio lokal i di hende ku no a bakuná. Boneiru ta keda na nivel di riesgo 2. Pa evitá un kantidat grandi di kontagio un biaha mas na nos isla, ta importante pa tur hende keda tene nan mes na e reglanan di corona.

Medidanan

Na enkuentronan privá maksimalmente 50 hende por bini huntu. Ta posibel tambe pa tene un evento ku maksimalmente 100 hende. Mester pidi un pèrmit pa e evento na departamento di Asuntunan Hurídiko. Pa eventonan di deporte un obligashon pa mèldu ta na vigor.

Den kaso di deporte pafó ta pèrmití públiko, e fanátikonan mester mantené un distansia di 1,5 meter. Den stadion ta pèrmití pa usa 50% di e kapasidat. Den kaso di deporte paden ta pèrmití pa usa 50% di e kapasidat, mucha bou di 13 aña no ta kontá den esaki. Ta pèrmití pa kanta i balia pafó. Ora di siere pa hóreka i establesimentunan di dibertishon ta keda meskos, esta 24:00 or.

Departamento di Salubridat Públiko ta hasi un yamada na hendenan ku no a bakuná ainda, pa bai pasa angua kontra corona. E hendenan akí por yama e number grátis 0800 0900 pa traha un sita. Ta posibel tambe pa pasa angua kontra corona sin sita riba djasabra na Sentro Deportivo Jorge Nicolaas.

Si un persona tin keho ku ta parse COVID-19, e persona ei tin ku keda kas i yama e number grátis 0800 0800 pa traha un sita pa hasi tèst.    

---

Lesa tambe:

• 
  Por deskubrí historia di antepasadonan ku e buki ‘Archivo Spièrtá’
• 
  ZJCN ta introdusí mehorashon den seguro médiko pa islanan BES 
• 
  Marco van de Kreeke bèk na aeropuerto Flamingo komo di dos direktor 
• 
  Otro charla mas pa mayornan tokante uso seif di medionan sosial serka mucha
• 
  Entrega di Kalènder 2025 “Ban Topa Nos Grandinan” na Gezaghèber John Soliano