Agente polisial ku a pèrdè bida den tráfiko a kore duru i no ta tin reibeweis pa motosaikel

KRALENDIJK- E agente polisial ku den nochi di 8 pa 9 di febrüari a pèrdè su bida di forma trágiko den un choke kontra di un outo. 

Investigashon ku a keda hasí ta mustra ku e hóben, ku tabata terminando su treinen komo agente polisial, a kore muchu duru na momento di e aksidente, pero tambe -i kisas asta mas importante- ku e no tabata tin un reibeweis pa kore riba motosaikel. 

“For di e investigashon inisiá dor di polis a resultá ku e koredó di motosaikel, nèt promé ku su kaida, tabata kore ku un velosidat di mas ku 100 km/ora. Na e sitio ei e velosidat máksimo permití ta di 40 km/ora. Mirando e grado di ekseso di e velosidat máksimo permití na e sitio ei i na e momentu ei, OM ta di opinion ku no tin kuestion di falta konsiderabel di e shofùr di e outo pa ku e aksidente”, asina un komunikado di parti di ministerio públiko ta bisa.

Mirando e resultado di e investigashon, lo no persiguí e shofùr pa su ròl den e aksidente.