Diripiente e tabat’ei fin di luna di òktober di aña pasá. ‘Spesialista den bienes inmóvil Anjelica Cicilia ta muda di Zuidas pa Kralendijk pa sirbi ‘su’ isla komo mandatario’, Atministrashon lokal tin komo kabes. Komo diputado ku no ta mará na un partido el a haña Planifikashon Urbano na su enkargo. Un pakete lógiko si bo a sigui su karera te ku awor.

Awor despues di shen dia ta tempu pa un kòmbersashon di sera konosí. Di mes nos a kuminsá papia tokante e wer. Pasobra awa ta kai riba e isla i banda di esei na Amsterdam ta friu tambe. Wer ku aparentemente Anjelica Cicilia gusta.

Mi ta enkantá ku friu. Ta un di e kosnan ku a atraemi di Hulanda, e diferente temporadanan. Semper mi a gusta esei. Mi ta kòrda ku un biaha mi tabata kana na Canada ora tabata minus 25. Mi tabata sintimi gewon na kas. Pues mi no tabatin nunka problema ku frieldat.

Mi mester konkluí awor kaba ku bo a hasi un eskoho robes?

No, bo ta bai muchu lihé. Pero e ta un transishon si. Di mundu empresarial pa polítika ta un stap enorme. I awor pa kolmo mi ta den menopausa. Algun ratu kaba.

Pues ta aki nan, den kalor, den kombinashon ku esei, mi ta bisabo ku esei ta basta intenso.

Nèchi den solo ku flèshnan kayente, esei ta dòbel.

Esei ta un bon indikashon. Kla. E kabes pa e entrevista aki ta kla. Mi ta yudabo.

Tempu pa bai na komienso di tur kos 

Mi a nase na Boneiru riba 11 di sèptèmber 1977. Segun mi esei ta riba un djadumingu. Mi a nase den hòspital na Playa. Un parto natural. Mi ta kontentu ku esei. Pasobra si tabatin komplikashon, bo mama mester a bai Kòrsou pa e parto. Esei si ta algu. Mi konosé diferente Boneriano ku semper a biba akinan i pa nan heful a nase akinan tambe. Pero si bo puntra nan, unda bo a nase? E ora ei nan mester bisa Kòrsou. I esei ta trese un sentimentu di ……… no ègt. Bo sa, esei ta lástima si.

Mi mama tabata Portugues. Mi tata di Kòrsou. Nan a topa otro na Kòrsou. Nan a kasa i despues a muda basta lihé pa Boneiru.

Pues ta p’esei nos tres a nase na Boneiru. Ami ta mayó di tres yu.

Tin dos dama, esun mas chikitu ta un kabayero. Mi ruman muhé ta biba na Hulanda. Den Rotterdam ainda. I mi ruman hòmber ta biba na Boneiru.

Kon un señora di Portugal ta yega Kòrsou?

Esei ta un storia prèt. Mi mama a yega di bai ku fakansi ku un amiga di dje. Mi mama ta bini di Madeira. Esei ta un isla ku ta kai bou di Portugal.

Nan a bai  ku boto di Portugal pa Kòrsou.

El a namorá asina di e isla ku seguidamente el a bai traha komo ‘au pair’.

Mi tata tabata pasa bai tur dia ora e tabata bai su trabou. Mi tata tabata seladó. Asina nan a siña konosé otro. I e ora ei nan a kasa.

Mi tata a haña un chèns pa bin traha na Boneiru.

Mi mama tabata un empresario hopi energétiko. E no ta na bida mas. Ya ta 13 ana ku e no t’ei mas. El a muri na 2011. Pero mi mama tabata doño di un fruteria.

Mi mama tabata un muhé ku hopi temperamento, disipliná i pashoná. Esei tabata un banda di e kriansa, e otro influensia tabata e parti di hala’tras Antiano di mi tata. Awor mi mester bisa ku mi mama su parti den su totalidat tabata mas dominante si. Pues a kria nos tur tres hopi ambisioso, stail di muchanan, si boso traha duru, si bo hasi bo bèst ku bo estudio, si bo ke yega mas leu den bida, e chènsnan ta spesialmente serka bo.

I si nan bini riba bo kaminda, bo mester wak pa gara nan.

Mi tabatin un hubentut tremendo i seif akinan. Hunga hopi riba kaya, ta afó. Bo tabata ègt mucha manera mester ta.

Ku mi djesun aña mi a bai enseñansa sekundario, mi tabata un alumno adelantá. Ku mi djesseis aña mi a kaba havo. I ya, e ora ei bo tin ku skohe.

Mi ta bisa hopi biaha ku bo por skohe pa kasa ku un bisiña mahos i haña sinku yu. Pero bo por bandoná e isla lihé i bai eksplorá mundu. Buskando aventura i desaroyo personal. Mi tabata sa ku mi kier a bai Hulanda.

Di un manera òf otro mi a sa semper ku mi ke hasi un estudio tékniko. I Universidat di Delft a yega di bini riba mi kaminda. E ora ei mi a pensa, hei, einan mi ke bai studia despues. 

Pero ya, mi tabatin 16 aña i mi mama a bisa ku bo no ta bai Hulanda ainda. Bo ta muchu yòn pa esei. E ora ei mi a hasi un stap intermedio na Kòrsou. Mi a biba sinku aña einan. Mi a studia arkitektura i ingenieria sivil na Universidat di Antia Hulandes. E estudio ei a dura sinku aña. Di bèrdat e tabata un estudio fantástiko.

Komo parti di mi estudio mi tabatin dos stazje. Un stazje kòrtiku na Boneiru serka un kontratista. E tempu ei Sabadeco tabata den desaroyo, einan mi a partisipá na konstrukshon di algun kas.

Despues tabatin un stazje grandi na Hulanda. Na e siudat Leiden mi a traha den un proyekto di konstrukshon.

E ora ei mi tabata sigur. Di bèrdat mi ke bai Hulanda.

Pues mi a bai bèk Kòrsou pa finalisá mi estudio. Na luna di dezèmber 1999 mi a muda pa Den Haag.

Ki imáhen bo tabatin di Hulanda, bo a yega di bai einan ?

Nò, nunka mi no a yega di bai Hulanda. Mi promé biaha tabata mi stazje largu. Mi tabata e úniko dama riba e sitio di konstrukshon, asta e trahadó di kòfi tabata un hende hòmber.

Mi no a sintimi nunka den minoria. Never, nunka, no komo hende muhé, no komo no-Hulandes, pa djis bisa, komo alokton. Mi no a sinti e kos ei nunka.

I segun mi esei tin di haber ku e edukashon i e antesedente di e  hende.

E promé siman mi tabatin un kaso kaba ku mi supervisor riba e sitio di konstrukshon.

Pasobra mi a yega i e tabatin mal beis òf mi no sa kiko. I el a bisa, bai buska kòfi p’ami, awor.

Mi a drei wak e i bisa, bo mes bai buska kòfi. I si bo ke, bo por trese mesora unu p’ami. Por fabor.

Si, bo sa, e tin hopi di haber kon bo mes ta reakshoná riba sierto kos. Pasobra mi por a bisa tambe, si mener, mi ta bai buska kòfi p’abo. I e ora ei mi lo mester a hasi esei tur dia for di e promé dia ei.

Aparentemente mi tabata sintimi sufisientemente sigur di mi mes. Mi por a manehá  mundu.

Si mi wak bèk awor aki, mi tabatin 16 aña ora ku mi a bai Kòrsou. I si mi mira awor muchanan muhé rònt dimi ku tin 16 aña, mi ta pensa Hesus, kiko ami tabatin den mi kabes e tempu ei?

Despues di mi estudio mi a kuminsá mesora ku mi master di Planifikashon Urbano na TU Delft. Pasobra mi a pensa, mi tin klaramente un formashon arkitektóniko, tékniko sivil. Lo no ta malu pa por dominá e nivelnan mas haltu tambe. Pues lagami bai hasi planifikashon urbano.

Na mes momento mi a bai traha na un ofisina di ingenieria na Amsterdam. E tempu ei e tabata un ofisina chikitu. Nos tabata nos tres.

Mi tabata traha fultaim. Mi tabata bai kolegio na Delft.

Pues mi tabata biba na Den Haag, studia na Delft i traha na Amsterdam

Bo bida di studiante a kai na awa?

Si, mi tabatin un mishon, bo ta kòrda? Ora mi tin un mishon, mi ta un hende pashoná.

Si mi tin gana di algu òf ke logra algu, mi ta bai hasi ègt mi bèst pa yega einan. Pues e tempu di studiante standart, manera tur hende tabatin na Delft, ku serbes den e obra di konstrukshon i tipo di kosnan asina, mi no tabatin tempu p’e.

Mirando bèk e tabata un hopi bon eskoho. Mi tabatin un título di ingeniero kaba, pues mi por a kuminsá mesora komo direktor di proyekto. Den e añanan ei, banda di haña eksperensia profeshonal, mi a haña mi master na Delft. 

Mi por bisabo si ku tabata trabou hopi duru mes.

Despues mi karera a bai kresiendo basta rápido. Mi a traha serka diferente organisashon, den maneho di proyekto, den mundu di diseñá, serka un ofisina di arkitekto. Tambe mi a traha un tempu komo konsultor, pa munisipionan i desaroyadónan.

Mi último periodo tabata serka Achmea, einan mi a traha seis aña i mei. Si, einan tambe a bai rápido. For di responsabilidat regional pa atkisishon i desaroyo, pa funshon di direktor, responsabel pa Hulanda henter.

Einan bo ta siña hopi di e institushonnan finansiero ku bo ta traha kuné. Kon e fondo di penshun ta mira e asuntu? Kon bo ta trata e invershonnan riba término largu? Kon bo ta pèrkurá pa semper bo ta salvaguardá e riesgonan di bo klientenan, pues fondo di penshun i penshonadonan? I kon bo por mitigá e riesgonan aki?

E ta pas pues ku bo ta diputado di Planifikashon Urbano. For di mucha kaba bo tabatin interes den téknika?

Si, komo mucha mi tabatin esei kaba. Semper mi tabata fasiná kon bo por konstruí algu.

Tambe por ehèmpel botonan grandi, mámutnan, edifisionan arkitektóniko spesial, konstrukshonnan.

Si, ku ta mannan di hende a traha nan gewon asina.

I kon nos por traha konstrukshonnan asina ku betòn i heru? Kon esei ta posibel?

No konstrukshon so, pero espasio tambe a interesámi. I kon bo ta organisá kosnan.

Mi ta kòrda ainda, dia nos tabata hunga ku pòpchi, ku mi ruman tabata okupá su mes ku peña nan kabei. I ami tabata okupá mi mes mas tantu ku organisá unda e kambernan di drumi ta bini? Unda e komedor ta bini? I kon nos por konstruí esei huntu? Ahan, mester tin un porta tambe pa e entrada.

Bo mayornan tabata sorprendí ku nan a pone un yu na mundu ku kier a konstruí i komprondé kon tur kos ta hinká den otro?

Nò, nan tabata stimulá esei na tur manera. Tur dos.  Tur dos tabatin e mentalidat ku si bo ke sa algu, bo ta bai profundisá den esei. Bai lesa mas di dje, bai profundisá kon bo ta traha algu.

Últimamente ainda mi tabata konta un hende ku tempu mi a lanta aki bo tabatin Freewinds.

Antes Freewinds tabata bini Boneiru tur ora. E habitantenan tabata yam’é e barku di pupu. Pasobra e hendenan tabata pensa ku un barku asina ta bini e isla i e hendenan ta bin aki pa deshasí di nan pupu. E turistanan ta bini aki pa hasi daño na nos naturalesa i despues nan ta bai bèk atrobe.

I mi ta kòrda ainda ku nos tabatin un proyekto hopi dushi. Mi tabata asina fasiná. Freewinds a bini akinan i nos tabatin mag di subi e barku ku nos klas.

Bo por imaginabo?

Bo ta un mucha i bo ta bai ku bo klas i bo dosente riba un barku asina i hendenan den ünifòrm ta risibíbo.

I nan ta bai kontabo kon e kos ei ta nabegá. Kon ta konstruí e barku.

Nan tabatin un biblioteka tambe i nos tabatin mag di bai e biblioteka ku nos skol i nos a haña buki. Awèl, ami a hañ’é fasinante, pasobra bo tabatin bukinan hopi bunita ku hopi pintura masha bunita. Mi por kòrda ku anochi lat mi tabata sinta lesa e bukinan ei ku mi flèshlait i mi tabata pèrdè mi mes den e storianan.

Loke tabata bon tambe den e tempu ei ta ku tur hende den e promé aña di skol sekundario, riba tur nivel, a haña lès kon bo mester kushiná, kon bo mester laba paña, kon bo mester lesa etikèt di paña. Mi a siña kon bo mester trata palu. Mi a siña las. Mi a siña di tur un poko na skol sekundario aki na Boneiru.

Mi tin e pensamentu ku den transkurso di añanan hopi di e programanan di desaroyo aki de fakto a bira ménos. Nos ke bai introdusí e tipo di kosnan aki atrobe.

Nos ta mira ku awendia muchanan ta muchu largu riba nan iPad òf telefon. I nan ta okupá nan mes ku asuntunan ku no nesesariamente ta kontribuí na nan desaroyo.

Naturalmente nos mester bai ku tempu tambe, pero nos mester wak pa nos no lubidá e norma- i balornan di nos kultura i di unda nos a bini. Nos mester traspasá esei na un manera korekto pa generashon benidero.

Si, ku mi ta den e posishon aki awor aki, ta un responsabilidat ku mi ta tuma na serio.

Atabo sintá awor einan komo diputado. Kiko a inspirabo pa bini bèk? Òf mihó bisá, pa drenta polítika?

Mi a bini aki pasobra di bèrdè bèrdè mi stima isla aki. Mi tabata kla tambe pa dal e stap ei. I mi a haña e chèns aki.

Pues e ora ei mi a haña e yamada di Clark Abraham na nòmber di koalishon ku e remarke nos mester di bo urgentemente, sin bo defakto e plan aki no por sigui. Pues laga tur kos kai por fabor i bini akinan.

Si, mi konosé Clark henter su bida, pasobra mi ta mas grandi ku Clark. Mi mayornan i mayornan di Clark tabata amigu. Pues Clark i ami a lanta huntu dentro di nos famianan. 

Pues mi konosé su ruman hòmber mas grandi i ruman muhé mas grandi tambe bon.

Naturalmente mi ta den un otro dinámika awor. Komo diputado profeshonal bo mester tene kuenta ku sierto asuntu. Nos ta sintá awor mas ku tres luna. Pues mi ta kuminsá komprondé.

Ora mi a kuminsá mi a pensa ku bo por hasi dos kos. Mi por kuminsá ku esaki i mir’é komo algu totalmente diferente. I kambia mi komportashon i mi bista riba kosnan.

Òf mi por ta gewon eksaktamente e Anjelica ku semper mi tabata. I mi ta bai wak kon ta bai. I mi ta kontentu ku mi a skohe pa e di dos.

Pasobra esaki ta gewon ken i kon mi ta. Mi ke papia di e kontenido i e kalidat di mi trabou i no di polítika rondo di dje.

Loke ta parsemi fèrfelu ta ku awor tin sentimentunan den wega ku ratu ratu bo no tin kontrol riba dje. Esei yama polítika.

Si, bo mester siña dil. Ta bai mihó si. Pero mi no a yega ainda. Tin hopi sintimentu rònt dimi ku mi no tin influensia riba dje.

Awor atrobe bo por skohe. Bo por skohe pa laga e sintimentunan  ei influensiá òf disidí riba bo bida. Òf bo ta bisa, tende, asina ta, esaki ta e kampo di wega, esaki ta un echo, ke asi sea.

Mi mester pèrkurá ku mi no ta perdè mi rumbo, mi vishon for di bista.

Separá di loke tur hende ta pensa. Pasobra awe e ta bon i mañan e ta malu i otromañan e ta insigur

Bo tabatin un bista di e kampo di wega ei yen di sintimentu i hedun?

Mi tabatin un bista relativamente kla si pasobra mi konosé e pueblo Boneriano. Mi konosé e hendenan akinan.

Loke ta lástima ta ku polítika ta determiná e sintimentu di dia.

Pues loke mi ke hasi en todo kaso, ta keda duna e hendenan informashon, ku echo, ku dato. Splika kon nos ta mira e desaroyonan riba e isla. Einan mi tin influensia.

Mi ta spera ku nos yega atrobe asina leu ku nos tur por wak futuro, lòs di koló polítiko. Ku nos ta skohe huntu pa e importansia, pa e bienestar i pa e desaroyo di nos isla.

Nos mester pèrkurá pa nos no pèrdè e enkanto di nos isla, loke ta hasi nos asina spesial.

Ku ta bai bini un tipo di fluho positivo atrobe. I pa esei si bo mester di tempu.

I e pregunta ta ku si bo ta haña e tempu ei.

Esei bo sa ora bo kuminsá ku esaki. Bon mirá bo no tin tempu nunka pa splika trankil ku algu ta bai dura dos, tres aña.

E ora ei bo tin naturalmente un bunita kartera.

Mi tin un kartera hopi desafiante. Dimes nos karteranan ta desafiante kaba manera bo sa. Mi kartera ta mishi hopi lihé ku e sintimentu di e pueblo.

Pero e ta e kartera tambe kaminda bo por mustra e diferensia, si nos bai hasi’é bon. P’esei e ta un kartera leuk asina. 

Bo tin di haber ku un pasado, ku un presente di e kartera i tin tambe un vishon unda bo ke bai.

Si, esei ta un bunita kampo di wega pa djis yam’é asina. Loke nos mester hasi bon mirá ta filtra tur e emoshonnan ei, tur e sintimentunan ei i realisá unda nos ta biba. Nos ta realisá nos mes den ki paraiso nos ta biba?

Antes ora awa kai akinan, tabata un fiesta.

Nos tur tabata kontentu i happy i yeiiii, e isla ta bira bèrdè i yeiiiii, ta bira un tiki fresku, yess.

I awor ora awa kai, ai mi Dios, tur hende ta fadá. Tur kaminda ta muhá, niun hende no por sali su kas, tur kaminda na lodo, tur kos ta fis.

Disgusto so. So so.

Pues nos mester bai bèk, amigunan, nos ta realisá si unda nos ta biba?

Kon bo ta bai kombertí e komunidat?

Wak, bon mirá e ta simpel. Nos sa por ehèmpel henter nos bida kaba ki ora ta temporada di awaseru riba e isla aki. E ta kambia podisé algu, podisé awa ta kai un tiki mas frekuente.

Pero nos sa ku si nos no limpia nos kamindanan, si nos no tin nos sistema di riol i fluho di awa na òrdu i awa ta yobe, ku nos ta haña problema grandi.

Nos sa esei.

Pues si bo ke tin kontrol i ke trese un tiki trankilidat atrobe, nos mester pèrkurá ku ta limpia nos kamindanan.

Ku ta chupa e posnan ei semper. Ku tur drenahe, tur awa,  fluhonan di awa natural riba e isla por fangu e awa.

Pues e ta kuminsá ku un simpel strukturashon di e trabounan. Ta trata di mantenshon. I e ta drumi lanta ku mantenshon.

Esei ta un ehèmpel hopi konkreto. Esei mi ta hasiendo awor, di tin kontrol riba esei.

Esei ta evidente. Esei ta parsialmente e benefisio di bo kartera. Abo por bisa ainda, hei, despensa, nos por bai atendé esaki asina, duna nos algu di tempu i e ora ei nos ta hasi’é asina.

Loke ta parsemi mas fèrfelu – den djes aña e isla a kambia hopi.

Pa loke ta trata poblashon, pa loke ta trata esaki, pa loke ta trata esaya.

Kon bo ta trese trankilidat den kontienda?

Nos strategia den esaki bon mirá ta hopi simpel. Pero na mes momento hopi desafiante. Naturalmente nos tin un akuerdo di gobernashon di sinkuenta punto ku nos ta traha kuné.

Nos ke tambe, i esei nos ta hasiendo kaba, traha hopi integral.

Pasobra un kambio di mi banda tin hopi impakto riba por ehèmpel Nina su kartera i robes pa drechi. Pues saliendo for di e ambishonnan dentro di e akuerdo di gobernashon nos ta wak, kiko nos por hasi integral?

Kiko ta e promé kos ku boso ke hasi pa haña kontrol riba e situashon?

Wak, e pais aki, e isla aki a krese asina lihé, ku por parti ta karga awa hiba laman.

Nos mester haña mas kontrol riba e flujo ku ta drenta. 

Nos mester purba por ehèmpel di haña mas kontrol riba merkado di bibienda. Hendenan ta sigui drenta, pero demanda i oferta a krese kompletamente trosé. Naturalmente nos tin instrumento ku nos por implementá manera e ordenansa pa bibienda. Algun kaso lo ta basta drástiko.

Nos ke splika stap pa stap kiko nos ta hasiendo. 

P’esei nos a kuminsá tambe ku e seshonnan di kòmbersashon semanalmente. Ku esaki nos ta yega serka mas hende. Pero nos mester sigui desaroyá nos komunikashon. Nos ta wak nos manera di traha krítiko, tende. Si bo ke yega serka e hende, bo mester duna nan e informashon korekto. 

Si bo ke pa e hendenan ta bon, bo mester duna nan e informashonnan korekto. 

Si bo no sa ku bo por pone kuminda riba mesa awe, tur e storianan ei ta bunita, pero …….

Eksaktamente. Pues bo no mester kuminsá ku duna e informashonnan korekto so, bo mester tin na mes momento akshonnan kaminda ku e hendenan ta mira resultado mesora.

Si mi drecha por ehèmpel un kaminda ku tabata kibrá pa basta tempu kaba, esei ta algu ku e hendenan ta mira mesora. Esei ta algu ku hendenan ta bai komentá riba dje. Esei ta algu ku no ta keda sin hala atenshon.

Banda di esei bo mester traha na e aparato, na e struktura i ambishonnan riba término largu.

Pero riba término kòrtiku nos mester mustra resultado tambe. Loke e hendenan ta sinti mesora sea den nan pòtmòni òf dirèkt den nan bida diario.

Bo tin e kurashi ainda despues di tres luna pa kere ku e strategia ei ta bai traha si boso haña tempu?

Si, mi ta kere esei siegamente. Den mi karera mi a traha hopi ku kultura di empresanan pisá. Mundu finansiero ta duru pa djis duna un ehèmpel.

Nos tin di haber ku un aparato atministrativo ku nos mester haña na nos banda. Haña un hende na bo banda ta nifiká ku nos mes mester sa promé unda nos ke bai. Nos mester tin nos vishon i ideanan riba un rei.

Si mi wak mi spesialidat esei ta nifiká un impakto kultural pa e servisio. Pasobra nos a kore hopi largu tras di e echonan. Kana paga kandela chikí chikí.

Mi mester bai hasi hendenan entusiasmá pa nos vishon. Di manera ku nos por bai traha huntu na dje.

E ta nifiká un kambio di kultura. Ta nifiká ku mester bai papia ku e hendenan riba nan responsabilidat. Nos mester krea un otro relashon di trabou.

Esei ta bira un kaminda largu. Hendenan tin basta  miedu.

Esei t’e palabra, hendenan tin miedu. E hendenan ta batí i tin miedu. Esei ta e aparato ku nos tin ku traha kuné awor aki.

Nos mester konvensé hendenan promé ku nan no mester tin miedu. Ku nan ta den un ambiente sigur.

Mustra bo ekspertisia. Pasobra komo diputado mi ke pa abo komo eksperto konsehami riba e posibilidatnan pa yega unda nos ke bai huntu.

Mi no ke pa bo bai skirbi loke ami ke. Mi ke pa bo yudami i konsehami, saliendo for di bo ekspertisia, konosementu i abilidat i eksperensia pa yega unda nos ke bai huntu.

I esei ta un kambio di kultura signifikante. Eiden nos ta awor aki.

Naturalmente un proseso asina mester di tempu.

Los di e dinámika i e kaos i e espektativanan bo mester tene duru na e mishon ei, pasobra si bo no hasi esei, si nos no kuminsá, nos lo no yega nunka.

Wak, nos interes komo gobièrnu, nos mishon ta hopi simpel, nos mester sirbi e pueblo. Esei ta nos trabou, hopi simpel.

Tur loke nos hasi, nos mester hasi’é na interes di e pueblo.

Ta pa nan nos ta sinta akinan.

Pues tur loke nos hasi, mester sali for di e idea ei, mi ta hasi algu pa e siudadano, mi ke drecha algu pa e siudadano. I oh my God, am I lucky. Ku mi ta den e posishon aki pa hasi esei.

Mester traspasá e sintimentu ei pa e ámtenarnan tambe.

Bo tin suèrtè ku bo ta sintá einan, asina  bo por yuda e pueblo pa bai dilanti.

Bo tin e sintimentu ku tin avanse? 

Nos a hasi progreso kaba tende, apsolutamente. Mi ta mira e diferensia kaba serka hopi ámtenar. Tin biaha nan ta di shòk. Esei ta parti di e proseso.

Tin hende ku por kambia mas rápido ku otro. Pero mi ta mira un kambio kaba serka sierto hende. Den nan konseho, den nan manera di atendé kos, den ser orguyoso, den reanudá nan ròl.

Nan tambe ta hañabo makambiá, pa djis bis’é asina, pa motibu di ta dirèkt, pa motibu di bisa kla kiko bo ke?

Sigur ku si. Pero ya, mi a biba 25 aña na Hulanda. Nunka mi no tabatin problema ku e kultura Hulandes.

Mi tambe a puntra mi mes ta kon bini. Wak, loke mi a kontabo promé, mi a lanta den un ambiente ku un mama ku ta bisa, Anjelica, si bo ke logra algu, bo mester gewon bai hasi esei.

Hendenan ku konosémi, henter mi bida, sa ku semper mi tabata asina. Pero e hendenan ku no konosémi, lo bisa hopi lihé, awèl e señora ei ta hopi makambiá. I esei ta hopi bon. Esei no ta nada.

Pero mi ta bon kla si den loke mi ke i unda mi ke bai. I mi ta dispuesto pa yuda tambe.

Mi no ta un hende ku pará di ariba ta bai bisabo kiko bo mester hasi.

Naturalmente mi ta bai bisabo bon kla si loke mi ke. Mi ta bai dunabo tur sorto di chèns pa yudami yega einan. Mi ta bai dunabo tur sorto di medio pa yudami yega einan.

Pero si bo ruiná esei òf si bo lanta tur dia ku e sintimentu ku bo no ke esei ………. Un sierto momento mi ta kla tambe kubo. I esei ta e persona ku mi ta.

Ademas bo ta krea e impreshon ei tambe, tende. 

E ora ei bo sa gewon kiko bo ta dil kuné.

Nos mester realisá ku ta algu realmente serio nos ta dil kuné. No ta djis algu. E ta futuro di nos isla. I esei ta responsabilidat di kada ámtenar tambe, di nos tur, pa ke duna un kontribushon na esaki.

Bo ta satisfecho, òf kon ku bo ke yam’é, ku bo regreso na e isla? 

Si. Mi kemen, mi no a bini e isla aki pa e sèn. Bo sa kuantu mi ta gana. I mi por bisabo, e no ta hopi. Na Hulanda mi tabatin mi bida ègt hopi bon na òrdu.

Pero mi a bini aki pasobra di bèrdè bèrdè mi stima e isla aki. Mi tabata kla tambe pa dal e stap ei. I mi  a haña e chèns aki.

‘Pero mi a bini aki pasobra di bèrdè, bèrdè mi stima e isla aki.’

Ounke e ta podisé un tiki zut, tòg e parsemi un mihó kabes ku e hedun di menopousa. E flèshnan kayente ta stòp dimes. Esei mi sa pa kasualidat.