KRALENDIJK – Bonaire International Airport (BIA), den kolaborashon ku Entidat Públiko Boneiru (EPB), ta bai mehorá e tereno na banda di e kaminda di entrada di aeropuerto den direkshon di sentro di siudat konsiderablemente. 

Di e forma aki  BIA ke drecha aparensia di e kaminda di akseso di Boneiru akí i oumentá siguridat den tráfiko pa peaton i siklista. E plan ta kuadra ku e plannan pa futuro di EPB pa mehorá mobilidat i siguridat di peaton i siklista den e área akí i na Boneiru. 

Ta trata di e tereno i e parti kantu di kaminda di Kaya International, for di e entrada prinsipal di aeropuerto te na e birada na e kazèrne di brantwer, entre e kurá di aeropuerto i e kaya. Einan BIA ta bai krea otro aña un área bèrdè i un kaminda ku kapa duru, ku kaminda esei ta posibel, fasilidatnan manera banki òf palapa. Den e periodo benidero BIA i EPB lo sigui traha riba e detayenan di e diseño. 

Ademas legislashon internashonal ta dikta ku kurá di aeropuerto mester keda liber di opheto ku lo por fasilitá ku ta subié. E supervisor di siguridat di aviashon sivil a hala atenshon di BIA pa drecha e situashon aktual, ku ta probechá di e oportunidat akí pa drecha aparensia di un di e kamindanan di akseso mas prinsipal di Boneiru konsiderablemente. Den e periodo te ku ora e mehorashon keda realisá, BIA ta tuma medidanan temporal pa asina kumpli ku e regulashonnan. 

Entusiasmá

Diputado Cicilia ta bisa: “Mi ta kontentu ku e inisiativa akí, kaminda EPB i BIA konhuntamente lo bai traha riba strukturashon di e área akí.”

“Di e forma akí nos ta trata di aportá na e isla i komunidat. Huntu nos ta kombertí e kaminda akí den un bunita entrada pa e isla i pa aeropuerto”, segun Van der Scheer, direktor di BIA.