Boneiru ta yama bon biní na buelonan èkstra for di Merka

KRALENDIJK – Despues di e eksitoso lansamentu di nobo di e buelonan for di Merka na luna di yüni, Tourism Corporation Bonaire (TCB) ta anunsiá e skemanan di buelo di American Airlines, Delta Air Lines i United Airlines pa e lunanan binidero. Komo parti di nos Plan di Rekuperashon pa Turismo TCB lo kontinuá ku e esfuersonan akí pa sigui duna un impulso na bishitantenan di nos isla i nos ekonomia lokal.

Tantu Delta Air Lines komo American Airlines ta mira un trènt positivo den demanda pa reservashon pa nos isla. Esaki pues ta un bunita oportunidat pa oumentá e kantidat di buelo pa Boneiru. 

Aktualmente te ku 20 di novèmber 2021 riba djasabra Delta tin un buelo semanal pa Boneiru for di Atlanta, Georgia, i nan ta bai ampliá e buelo semanal akí te na dos buelo semanal riba djárason i djasabra entre 24 di novèmber 2021 i 15 di desèmber 2021. Despues di esei tin buelo diario kuminsando riba 18 di desèmber 2021 te 4 di yanüari 2022, ku eksepshon di riba djamars. For di 5 di yanüari 2022 te 9 di aprel 2022 tin un buelo planiá riba djaluna, djárason, djabièrnè i djasabra.

E skema di buelo aktual di American Airlines te ku 6 di novèmber 2021 ta konsistí di dos buelo semanal riba djárason i djasabra for di Miami, Florida. For di 8 di novèmber 2021 te ku 3 di yanüari 2022 ta añadí un buelo riba djaluna na e skema di buelo. Durante e periodo di fakansi, for di 16 di desèmber 2021 te 3 di yanüari  2022 tambe tin buelo diario pa Boneiru.

Dia 6 di novèmber 202 United Airlines ta reanudá su buelonan for di tantu Houston, Texas ku un buelo semanal pa Boneiru riba djasabra ku e buelo di regreso riba djadumingu, komo su buelo semanal riba djasabra for di Newark, New Jersey.

Ku e kantidat di buelo direkto bishitantenan for di Merka i Kanada por bishitá Boneiru mas fásil. E buelonan èkstra ya kaba ta online i por reservá nan pa e lunanan binidero.