KRALENDIJK- Riba 21 di desèmber último Businesspark a organisá su promé evento di networking yamá “Konektando”. Meta di e evento akí ta pa trese empresarionan lokal huntu i brinda nan e oportunidat pa kompartí i interkambiá konosementu i eksperensia ku otro.

E anochi tabata bon bishitá pa mas ku 100 persona. E grupo ku tabata presente pa sosialisá ku otro a konsistí di entre otro empresarionan di Businesspark, otro empresarionan lokal, partnernan, bankonan i tambe e mèntòrnan i coachnan ku sea a duna kurso, guia òf te ainda ta guiando e empresarionan. 

Xenah Cicilia, maestro di seremonia di e anochi, a habri e promé parti di e evento. Personanan ku a hiba palabra tabata diputado di desaroyo ekonómiko Hennyson Thielman i un empleado di e departamento di asuntunan ekonómiko di gobièrnu di Boneiru. A sigui despues ku otorgamentu di sertifikado na e kursistanan ku resientemente a partisipá na e kurso di merkadeo di Businesspark. Na final a laga e anochi ku un agènda habrí pa asina por a sosialisá i stimulá interkambio bou di empresarionan. DJ Veloz a sòru pa un bon ambiente, miéntras e bishitantenan por a disfrutá di e bar i pasapalu.

 Jermainy Diaz, kordinadó di Businesspark, tabata sumamente kontentu ku e reakshon i interes pa e promé edishon di ‘Konektando’. “Nos kièr hasi ‘Konektando’ un evento ku ta tuma lugá kada kuartal kaminda empresarionan por keda topa ku otro i asina konektá riba nivel empresarial. Despues di nos promé kurso ku nos a organisá, empresarionan lokal a indiká ku nan ta sinti falta di un evento kaminda nan por topa i kòmbersá tokante nan negoshi. E intenshon ta pa sigui organisá mas evento di ‘Konektando’ i desaroyá e konsepto kada bes mas tantu. E vishon final ta pa Businesspark tin tur e instrumentonan nesesario pa kada empresario ku kièr ekspandé, mehorá òf elevá nan negoshi òf konosementu”, segun Jermainy Diaz.

Sitio di trabou

Businesspark ta un sitio finansiá pa gobièrnu di Boneiru, kaminda empresarionan inskribí tin akseso na espasio pa ofisina, internèt, guia, kurso i training. Businesspark ta un sitio di trabou i enkuentro pa empresarionan pa siña di otro i inspirá otro. E ta un sitio tambe pa bou di guia profeshonal krea, manehá òf sigui desaroyá negoshinan eksitoso.