Departamentu di reservashon EZ Air ta habri 7 dia pa siman awor

Willemstad- Entrante awe, djadumingu 26 di sèptèmber 2021 pasaheronan di EZ Air na Kòrsou tin mas opshon pa kumpra nan pasashi. E ofisina di benta di EZ Air na aeropuerto Hato for di awe ta habrí tambe tur djadumingu entre 10 ‘or di mainta i 4 ‘or di atardi.

Segun EZ Air, esaki lo fasilitá hopi hende ku ta preferá di pasa personalmente den wikent pa kumpra nan pasashi. René Winkel, direktor di EZ Air, ta bisa ku tabata nota ku mas i mas hende ku tabata yega riba djasabra na e ofisina di aeropuerto di Kòrsou. “Ta pesei nos a disidí pa habri djadumingu tambe, pa nos duna nos pasahero mas opshon”, asina Winkel a bisa. Winkel ta mustra ku hende por opta tambe pa kumpra pasashi ‘online’, 24 ora pa dia i 7 dia di siman via www.flyezair.com.

Mientrastantu e kompania di aviashon ta hasiendo preparashon tambe pa habri su ofisina di benta na Aeropuerto Flamingo tambe. “Nos a saka aviso den diferente medio di komunikashon i nos departamentu di rekurso humano ta pasando den e proseso di selekshon pa empleado adishonal. E konstrukshon di nos ofisina banda di e bankomátiko di MCB na aeropuerto ya ta kla pa kuminsá funshoná”, segun Winkel a splika. Pasaheronan di Boneiru i Aruba mientrastantu den wikent por yama na (09)839 1234 pa por wòrdu yudá via telefon.

Avion nobo

Banda di e ampliashon di puntonan di benta, e kompania ta ehekutando buelo di prueba ku nan avion nobo Saab340 pa por kuminsá ehekutá buelonan komersial ku esaki. Winkel a splika ku e kompania ta pasando den un periodo hopi drùk pero tambe unu ku ta generá entusiasmo i satisfakshon serka e tim di empleado.

“Nos tur ta trahando duru pa nos inkorporá nos avion nobo. Esaki lo nifiká un stap basta grandi pa nos komo EZ Air, ámbos pa loke ta trata ruta, kantidat di pasahero ku por transportá i tambe e nivel di servisio ku nos ta ofresé nos pasaheronan”, asina Winkel a bisa.

Hopi pasahero ta sperando e komienso di e ruta pa Medellin for di Kòrsou i Boneiru. Medellin ta un destinashon hopi gustá na e islanan ABC, pero aktualmente por ta algu trabahoso pa por yega ya ku mester biaha sea via Bogotá òf Panamá pa por yega Medellin.