Direktor di Tourism Corporation Bonaire, Miles Mercera, a presentá e vishon pa su promé 100 dianan den funshon

Kralendijk – Durante di e konferensia di prensa ku a tuma lugá djárason dia 7 di yüli, Direktor di Tourism Corporation Bonaire (TCB), señor Miles Mercera, a presentá e vishon di TCB i Boneiru pa e 100 dianan benidero. E vishon ta konsistí di inisiativanan i strategianan derivá di e ‘Tourism Recovery Plan’ i tambe e ‘Strategic Tourism Plan’ ku TCB lo inkorporá na momentu di implementashon.

E metanan di e ‘Tourism Recovery Plan’ ta pa restablesé merkadonan eksistente, diversifiká e produkto turístiko, i oumentá e partisipashon di e komunidat lokal. Direktor señor Miles Mercera, a kuminsá su karera nobo dia promé di yüli 2021. Ku un ekperensia ekstenso den e industria global di hospitalidat i turismo, Miles Mercera ta kla pa traha huntu ku e tim di TCB, sektor privá i públiko, riba e rekuperashon di e industria di turismo na Boneiru. Esaki ta un kapítulo nobo pa TCB i tambe pa partnernan lokal.

Durante di e 100 dianan benidero, TCB lo kuminsá traha riba diferente proyekto i inisiativanan krusial ku lo establesé i posishoná Boneiru na un nivel mas haltu. Asina ta mas atraktivo pa e merkandonan eksistente i merkadonan nobo. Algun di e proyekto i inisiativanan ta:

• Krea un kolaborashon mas sólido ku sektor públiko i privá;
• Krea un kolaborashon mas sólido ku gobiernu di Boneiru;
• Oumentá e partisipashon di e komunidat lokal;
• ‘Re-branding’ di Boneiru;
• Desaroyá e superfisie aéreo;
• Bin ku inovashonnan efektivo;
• Kolektá, analisá i raportá data di bishitantenan ku ta bin Boneiru.

“Ta importante pa partnernan i komunidat di Boneiru ta na altura di tur e desaroyonan den turismo na Boneiru i tambe e datanan real di turistanan ku ta bishitá nos isla”, segun señor Mercera. “Boneiru ta un isla outéntiko ku un balor grandi pa nos bishitantenan i nos komunidat. Nos naturalesa, gastronomia i aktividatnan eko-aventurero ta posishoná Boneiru komo e promé destinashon di ekologia den Karibe.”

---

Lesa tambe:

• 
  Prevení Zika, Dengue i Chikungunya |Aviso pagá
• 
  Zorgtuin Gorssel a konta tokante eksperensia positivo ku trato di pashent ku Alzheimer
• 
  PVDA/GROENLINKS e partido mas grandi bou di votadónan Hulandes den eksterior
• 
  Pashasi pa i for di Boneiru lo bira un poko mas karu atrobe ku subida di tarifa di BIA
• 
  Persona ku un limitashon riba islanan BES ta haña mas derecho