WILLEMSTAD – E instalashon di asina yamá E-gates na aeropuerto Hato di Kòrsou, lo mester hasi e proseso di pasa imigrashon mas fásil i efisiente pa paseheronan ku ta usa e aeropuerto.

Ya pa algun siman biahero por a mira e trabounan ta andando, ku instalashon di E-gatenan nobo i na kantidat mas grandi ku tabata e kaso anteriormente. Minister di Hustisia di Kòrsou, Shalton Hato ta mustra su mes kontentu ku e progreso. 

“Na e momentu aki tekníkonan ta kabando ku e último testnan i denter di poko tur e-gates nobo lo ta funshoná optimal” minister Hato a bisa. 

Agradesido

Minister Hato a mustra su mes agradesido tambe pa e koperashon durante e periodo di instalashon i transishon. “Danki na Curaçao Airport Holding, EY i Vision Box ku a yuda den e proseso aki.”