Kralendijk- ABC Online Media, kompania mama di entre otro Bonaire.nu i AworBonaire.nu huntu ku e kompania Linkels & Partners ta ehekutando un enkuesta pa midi satisfakshon di kliente pa ku e kompania mas importante di Telekomunikashon na Boneiru.

E enkuesta ta inkluí entre otro UTS/Chippie, TELBO, Digicel i Flamingo TV. Segun Sylvia de Leon, direktora di ABC Online Media, lesadónan ta apresiá e tipo di enkuestanan aki pa por duna nan opinion. “Tin asina kos ku bo ta tende. Tin biaha hopi positivo, pero tin biaha tambe hopi negativo. Ta pesei nos ta haña bon pa midi i tambe pa por kompará e diferente kompania riba diferente aspekto”, asina de Leon a splika.

Servisio

Liane Bonofacia, sikóloga na Linkels & Partners ta bisa u e kompania ta duna hopi kurso pa loke ta trata servisio na kliente. “Loke bo ta ripará ta ku tin biaha kosnan hopi chikí por kondusí na iritashon serka e kliente, pero na otro banda sierto detayenan por laga e kliente tambe enkantá.”

Segun Bonofacia otro elemento ku ta importante, ta pa skucha keho di kliente. “Keho ta importante, e ta asta nesesario pa bo sa unda bo tin ku drecha. Ignorá un keho ku ta na su punto ta e kos mas malu ku un kompania por hasi”. E sikóloga ta splika ku e enkuesta ta wòrdu ehekutá pa nan propio kuenta.

“Ningun hende òf kompania ta pagando pa e servisio aki, pero nos gusta bin ku sierto di e enkuestanan aki. Komo sikólogo nos ta bisa semper ku ora bo midi algu di forma ophetivo, bo sa kon algu ta realmente”, asina Bonofacia a bisa.

E enkuesta por wòrdu yená na tres idioma: Papiamentu, Hulandes i Ingles aki.