Enkuesta ta mustra: Konsumidónan ta haña servisio di Telekomunikashon karu na Boneiru!

Kralendijk- For di un unkuesta ku e kompania di konsùltent Linkels & Partners, huntu ku ABC Online Media a hasi ta sali ku en general konsumidónan riba e isla ta di opinion ku e produkto òf servisio ku ta haña ta karu pa e preis ku ta paga pa esaki.

Telbo ta e kompania ku segun kliente ta duna ménos balor pa e preis ku ta paga. 34% di esnan ku a partisipá na e enkuesta ta opiná ku e kompania ta duna ‘balor pa bo sèn.

Klientenan di Digicel tampoko no ta dje positivo tokante e balor ku un kliente ta haña pa su sèn. 42% ta opiná ku na Digicel un kliente ta haña balor pa su sèn.

FLOW/Chippie ta skor un tiki mas miho, ku 54% di e partisipantenan den e enkuesta indikando ku na e kompania aki bo ta haña balor pa bo sèn.

Esun ku ta skor mihó den e enkuesta ta Flamingo TV. Akinan 67% di su klientenan ta di opinion ku e kompania ta duna ‘balor pa bo sèn’. Flamingo TV den e enkuesta tambe ta esun ku a skor mihó ora ta trata e aspekto di servisio na kliente, pero tambe pa loke ta traha e spit ku kual ta resolvé problema.

E kompania Telbo, ku tin mas tantu kliente ku tur e otro provedónan a skor mas suak pa loke ta traha servisio na kliente, spit ku kual ta resolvé problema i awor tambe e aspekto di ‘balor pa bo sèn’.