KRALENDIJK – Entidat Públiko Boneiru (EPB) tin e intenshon di bai emití tereno pa un proyekto di kuido di hende grandi. Ta trata di dos parsela, inkluso e edifisio di ‘Magasina di Rei Amboina’, disponibel na ‘Stichting Zorg en Welzijn Groep’ (ZW-Groep) i Fundashon Cocari II. 

E parselanan akí ta situá den e área entre Kaya Mendelssohn, Kaya Anna, Kaya Calixta i Kaya Sonmontuno.

ZW-Groep a haña e tarea serka Ministerio di Salubridat Públiko, Bienestar i Deporte pa elaborá e plannan pa fasilidatnan di kuido di hende grandi na Boneiru. Aktualmente huntu ku Cocari II, ZW-Groep ta trahando riba e proyekto importante akí pa komunidat boneriano. E proyekto akí ta karga e nòmber ‘Nos Bario’.

Por reakshoná

EPB a komuniká tambe ku suidadno por protestá kontra di e intenshon aki, por ehèmpel pasombra nan mes ke bin na remarke. Esaki sinembargo lo mester hasi dentro di 20 dia. Esaki por ta algu kompliká ya ku tin ku hasi e notifikashon aki via di un wisio sumario (Kort Geding). 

Esnan ku ke mas informashon tokante e proseso aki, òf ku tin otro pregunta, por tuma kontakto ku direktorado di Planifikashon i Desaroyo via [email protected].