WILLEMSTAD/KRALENDIJK – Kòmpania di aviashon EZ Air dentro di poko lo bai introdusí un nòmber komersial nobo pa su operashon. E desishon aki ta resultado di e akshonnan di e doñonan di e kompania di aviashon britániko EasyJet, ku a registrá diferente variashon di e nòmber i e palabra ‘EASY,’ den kombinashon ku diferente palabra relashoná ku aktividatnan den aviashon.

EZAir resientemente a risibí un karta ofisial di parti di EasyJet kaminda ta akusá e kompania di violashon di nan derechonan di propiedat intelektual. Tambe, ta eksigí ku EZ mester stòp di bende pasashi di forma imediato pa Colombia na tur Britániko, Europeo i Merikano.

“Nos no ta ètòl di akuerdo ku ponensia di EasyJet. Sinembargo, nos ta un kompania di aviashon relativamente chikitu. Nos no por permití nos mes pa bai hiba un bataya hurídiko prolongá kontra di un kompania mucho mas grandi, kaminda no ta sigur ku e lo tin un fin faborabel pa nos”, asina direktor di EZ Air, René Winkel ta bisa tokante e situashon. “E grupo EasyJet ta un grupo ku tin hopi kapital i rekursunan enorme, i nos komo kompania di aviashon relativamente chikitu, simplemente no por hiba e lucha aki.”

E akshon di parti di EasyJet kontra di EZ Air no ta para riba su mes. EasyJet a hiba e kompania kolombiano EASYFLY dilanti, pa e mesun keho di infrakshon di marka. “Un bataya ku por sierto a dura años”, segun Winkel ta splika. Finalmente, algun luna pasá, EASYFLY a disidí di tambe introdusí un nòmber nobo riba su avionan, ku ta ‘Clic’.

Eskoho definitivo

EZ Air ainda ta trahando riba e selekshon final di su nòmber nobo. “Ounke ku entidat legal, e organisashon, i e operashon di nos kompania ta keda kompletamente igual, eskoho pa un nòmber nobo riba avionnan tambe lo nifiká entre otro un website nobo.

Winkel ta primintí ku, asina tur kos ta kla, lo duna su klientenan, pa ken nada no ta kambia, e informashon nesesario. “Durante e añanan, nos a logra establesé un posishon fuerte riba nos rutanan dor di ofresé un bon produkto i avionnan kómodo. Nada di esaki lo no kambia, i nos ta mira pa dilanti di forma positivo” segun Winkel a bisa.

Akseptabel

EasyFly group mientrastante a reakshoná ku satisfakshon riba desishon di EZ Air pa duna su avionnan un nòmber nobo i a laga sa ku nan ta satisfecho ku e manera ku e asunto lo keda resolvé.