Notisia

Frakshon Coffie ke informashon tokante hürmentu di edifisionan dor di Gobièrnu

Resientemente Gobièrnu a hür e edifisio aki pa su departamentu di Komunikashon. Coffie ke sa awor kuantu mas tin, i ki gastu esaki ta trese kun’é. Potrèt: ABC OnlineMedia

Kralendijk- Miembro di Konseho Insular, Dasiy Coffie, ke risibí informashon di Kolegio Ehekutivo tokante hürmentu di edifisio partikular dor di gobièrno. Coffie ta nota ku, mientras ta hür diferente edifisio serka doñonan partikular, tin vários edifisio ku ta di gobièrno mes, ku ta pará bashi.

Coffie ta pidi pa Konseho Insular por haña un inventarisashon di tur e edifisionan di Gobièrnu ku nan balor. Tambe Coffie ke sa si edifisionan aki ta riba balansa di nos kuentanan anual i pa kua montante. Ademas Coffie ke sa si por duna Konseho Insular un bista tambe di kua edifisio ta den uso i uso pakiko.

Preis di hür

Den su karta Coffie ta puntra tambe kua ta e direktorado- i/o servisionan ku ta alohá den edifisionan ku nó ta di Gobièrnu. E konsehal lo ke sa tambe Kolegio por fasilitá Konseho Insular tur e kontraktnan ku tin. “Di e manera aki nos por haña klaridat pa loke ta e durashon di e kontraktnan i tambe e preis di hür ku ta paga”, asina Coffie ta skibi.

Edifisio Sentral?

Banda di esaki, Coffie lo ke sa ki maneho Kolegio Ehekutivo ta hiba pa ku alohamentu di nos direktorado- i servisionan? Tambe Coffie ke sa kuantu lo kosta pa konstruí un edifisio sentral pa hinka tur e servisionan aden, ku lo ta mas efisiente i ku lo por kondusí tambe na un mihó servisio na komunikdat.

Coffie ta bisa ku, aunke ela hasi su preguntanan por eskrito, e ta spera ku esakinan lo por wòrdu kontestá dor di Kolegio Ehekutivo den un di e próksimo reunionan di Konseho Insular.

Deel dit artikel
Rocargo
Rocargo
Rocargo
Rocargo