KRALENDIJK – E frakshon di Movementu di Pueblo Boneriano (MPB) den un karta a ekspresá nan preokupashon pa ku e situashon na lèntfel. Según MPB ta bisa, e situashon mientrastantu a a eskalá pa un krísis, kaminda ku habitantenan den bario mester a evakuá. E partido tin algun pregunta ku a bai Kolegio Ehekutivo.

Entre otro e Frakshon ke sa kiko ta hasiendo aktualmente pa evitá ku e kandela ta sigui plama bai otro parti di lèntfel, unda habitantenan ku tin problema di salú por buska yudadansa médiko, i si tin un number di kontakto pa esnan ku ta biba den e área, pa ora nan sinti ku nan tambe tin ku evakuá.

Urgensia

MPB ta hasi un yamada urgente na Entidat Públiko pa tuma medida rápido pa solushoná e molèster i garantisá e salú i seguridat di e habitantenan. “Prevení ta mihó ku kura despues.”, asina lider di MPB Hennyson Thielman a bisa na nòmber di MPB.