Gezaghèber Rijna ta bishitá Galileo Reference Centre

Kralendijk – Gezaghèber Edison Rijna a hasi uso di su biahe pa World Conservation Congress na Marseille pa hiba vários kòmbersashon di progreso. Tambe riba invitashon di ministerio di Infrastruktura i Maneho di Awa el a hasi un bishita na Galileo Reference Centre na Noordwijk.

Den Galileo Reference Centre ku a habri na aña 2018 nan ta monitoriá dato ku e sistema global di nabegashon pa medio di satélite ta generá. E datonan ku e Sensor Station ku nan ta bai traha na Boneiru ta generá, tambe ta bai resultá na Noordwijk aworó. E direktor di Asuntunan Internashonal di ministerio di Infrastruktura i Maneho di Awa Peter Diez i mènedjer Peter Buist di Galileo Reference Centre a yama gezaghèber Rijna bon biní.

Dia 14 di yüli minister Cora van Nieuwenhuizen (di e tempu ei) a duna lus bèrdè pa kuminsá ku establesimentu di un Galileo Sensor Station na Boneiru. Dia 1 di desèmber e diseño mester ta kla. Despues ku finalisá e destaho e konstrukshon lo kuminsá meimei di aña 2022. Entrega di e trabounan ta tuma lugá dia 1 di mart 2023. Gezaghèber Rijna, kende a keda impreshoná pa e rekorido, a ekspresá e deseo pa den futuro Boneiru bini na remarke pa otro proyektonan oropeo tambe.

Galileo ta un sistema di nabegashon sivil oropeo pa determinashon di entre otro sitio i ora pa vários meta.

Lesa tambe:

• 
  Famia tin mas ku djes dia ta  buska Pedro Werleman ku ta pèrdí
• 
  ‘Kada minister di Kòrsou un tarheta di krédito di 25.000 dòler pa biahamentu, lo spar sèn’
• 
   Búskeda di e persona pèrdí Arthur ‘Turbo’ Cecilia ta kontinuá
• 
  Daisy Coffie (M21) ke wòrdu aktualisá tokante situashon na Bonlab
• 
  Arjen de Wolff a huramentá komo grifir interino