KRALENDIJK- Kolegio ehekutvio di Boneiru ke pa yega na konstrukshon di un sentro multi-funshonal pa stimulá entre otro kultura, pero tambe pa por atraé otro tipo di turismo, por ehèmpel turismo di konferensia.

Esaki a keda tresé dilanti pa diputadonan Clark Abraham i Anjelica Cicilia djabièrne atardi. “Realidat ta si nos ke organisá evenementu kultural, nos no tin un luga na drechi pa hasi esaki. Nos no tin un teatro, òf un sentro kultural pa organisá tipo di evenemento asina, i esaki ta nesesario”, asina Abraham a splika.

Kolehio ehekutivo ta di opinion sinembargo ku e mihó kos lo ta pa konstruí un sentro multi-funshonal pa por sirbi vários meta, manera tambe pa atraé turimso di konferensia. Segun e diputadonan esaki ta pas den un esfuerso pa diversifiká ekonomia. Ámbos diputado a papia na vários momento di e importansia pa diversifiká ekonomia di Boneiru. 

“Nos ke keda enfoká riba turismo só, òf nos tin ku pensa tambe den atraé otro tipo di aktividat ekonómiko”, asina Abraham a puntra. 

Desaroyo sostenibel

E parti di diversifikashon di ekonomia ta kai den e parti di un desaroyo sostenibel, pa kua Kolegio Ehekutivo ke hasi liber fondonan nesesario, pa a lo ménos kuminsá delineá e plan i kuminsá ku realisashon di esaki den aña 2025 i/òf 2026.