Kralendijk – Pa medio di proyekto “KREA TRABOU’ Djárason, 9 di yüni entidat públiko di Boneiru a sera un akuerdo ku SELIBON ku e meta pa krea kuponan di trabou pa e personanan ku a keda sin entrada pa motibu di e pandemia di Covid-19.

Diputado Hennyson Thielman ku tin e kartera di desaroyo ekonómiko den kolaborashon ku Diputado James Kroon, ùnidat di asuntunan ekonómiko i Plenchi di Trabou a hasi’e posibel pa bini ku diferente proyektonan pa stimulá aktividat ekonómiko i asina krea kuponan di trabou. Algun di e proyektonan di ‘Krea Trabou’ ta primeramente trabounan di mantenshon públiko ku lo wordu ehekutá pa Selibon. Djárason 9 di yüni  direktor di Selibon señor Leito a firma un akuerdo pa kuminsá ku e trabou nan di e proyekto.

Entidat públiko Boneiru pa medio di ‘Krea Trabou’ a destiná 500 mil dòler na proyektonan di mantenshon ku lo ser ehekutá pa Selibon pa krea kuponan di trabou. Algun di e trabounan di mantenshon ta enserá fèrf i touch up sitio nan públiko, pone banki i kap mata. E sitionan ta entre otro Asiento Pir di sùit, rotonde Bonaco, rotonde Nikiboko sùit, rotonde Sabana, rotonde sùrnan di Rozendaal, Plaza Fraternan di Tilburg, algun sitio den sentro di siudat, bushalte den sentro di siudat, bakinan di mata dilanti TCB, Wilhelminaplein, lugá di sinta dilanti duana, lugá di sinta plasa machi Mimi, lugá di sinta dilanti kantor di haf, speeltuin Rincon, Plasa Broertje Janga i plenchi su tras i dak dilanti pompstashon di Rincon.

39 kupo di trabou

E suma total di 500 mil dòler prinsipalmente ta pa kubri e gastunan di salario i seguro pa e trahadónan. Total a krea 39 kupo di trabou direkto ku ta konsistí di un tim di kap mata i un tim di mantenshon di áreanan públiko. “Mi ta sumamente kontentu ku e akuerdo aki. Nos di Gobièrnu di Boneiru a traha duru pa por brinda di forma direkto posibilidat di trabou pa esnan ku a pèrdè esaki. Na mes lugá ta hasi mantenshon i krea un moveshon ekonómiko na nos isla” segun diputado Thielman.

E intenshon ta pa Selibon tuma personanan ku ta inskribí na Plenchi di Trabou pa asina e kuponan ta bai na e persona nan ku a pèrdè nan trabou òf ta buskando trabou. Selibon su tarea lo ta pa manehá e trabou nan i sòru ku nan ta keda hasi manera palabrá, i komuniká ku Gobièrnu pa loke ta trata w ehekushon di e proyektonan.