KRALENDIJK – Un desishon di indemnidat, konosí tambe komo un desishon di resguardo, mester a bini riba mesa djamars anochi den Konseho Insular pa salba e deklarashon di akountent Astrium Overheidsaccountants aprobando e kuenta finansiero anual pa Entidat Públiko di Boneiru (OLB).

Un deklarashon di indemnidat ta un desishon hudisial pa protehá un persona òf entidat for di responsabilidat òf indemnizashon. E por wòrdu tumá pa un organisashon, manera un Kolehio Ehekutivo, pa protehá nan mes òf nan miembronan for di konsekuenshanan hudisial di sierto kos ku no a kana bon òf asta ta bai kontra di lei. 

E desishon a bira nesesario despues di ku Astrium a konkluí ku tabatin vários punto di ireguliaridat pa loke ta trata presupuesto kompará ku gastunan real ku a hasi. Un di e puntunan preokupante tabata ku Kolehio Ehekutivo a gasta kasi 7 mion mas ku e suma ku a ser pone den presupestu pa un plan di despidimentu di trahadónan mayor di Entidat Públiko di Boneiru (OLB).

Línea di partido

E partidonan atrobe a vota segun e líneanan di partido pa aproba òf rechasá e desishon di indemnidat ku Bestuurskolèshi a pidi. E tres miembronan di Partido Demokrátiko (PDB) a vota tur kontra e desishon pa duna Kolegio Ehekutivo indemnidat. E miembronan di partidonan di oposishon a ekspresá nan preokupashon ku ta normalisá defishensianan den e proseso di presupestu i gasto ku un desishon di resguardo pa Bestuurskolèshi.

E miembronan di koalishon MPB i UPB no a mira nada malu den otorgamentu di resguardo na Kolehio Ehekutivo i tur a vota na fabor di esaki. 

Kuenta anual

Despues di e interkambiunan verbal bastante fuerte for di oposishon tokante e imperfekshonan den e proseso i e resguardo pa Bestuurskolèshi, e aprobashon di e rapòrt finansiero riba su mes a bira kasi djies un formalidat.

Atrobe, e miembronan di koalishon gobernante a vota a favor, mientras ku e tres miembronan di PDB a vota kontra aprobashon di e rapòrt finansiero manera presentá.