Boca Chikitu – Djasabra último Junior Rangernan a salba un turtuga yòn for di sargasum na Boka Chikitu na Boneiru. Danki na e esfuerso di e grupo i mui en partikular e ayudo di Junior Ranger Jad Dabboussi, por a hiba e bestia seif bèk laman.

E kordinadó di e Junior Rangernan a elogiá e esfuerso di e grupo: “Kada un di boso ta personifiká loke ta nifiká pa ta un Junior Ranger. Durante un aktividat un di e rangernan a ripará e turtuga, ku tabata pegá den e alganan. Ku union di forsa e rangernan hóben a sa di salba e bestia ku hopi kuidou i despues di un kontrol breve a pon’é bèk den su habitat natural. Nèt promé ku a laga e turtuga yòn den libertat a dun’é e nòmber ‘Sargasum’”.

Junior Ranger, un programa di e organisashon di naturalesa STINAPA ku ta embolbí hóbennan  den konservashon di naturalesa, ta tene ku regularidat akitividatnan rònt e isla. E aktividatnan aki ta brinda ekperensianan balioso den práktika pa hóbennan. Pa medio di semehante insidentenan nan ta bira konsiente di e fragilidat di e sistema di eko lokal i e importansia di akshon inmediato den situashonnan di emergensia.