KRALENDIJK – Direktiva di STINAPA Bonaire ta kontentu di por anunsiá, ku a kontratá Kalli De Meyer entrante 1 di sèptèmber 2023, pa asumí e puesto nobo di Direktor di Konservashon. E trabou di e Direktor di Konservashon lo enfoká riba e maneho efisiente i efektivo di e parkenan di STINAPA, i tambe di e departamento NHRU (Nature & Historical Restoration Unit).

Kalli lo traha den estrecho kolaborashon ku e gerentenan di e parkenan i nan personal, pa fortalesé operashon di e parkenan: Parke Nashonal Marino di Boneiru, Washington Slagbaai Park i e maneho inisial di e parke Rooi Lamoenchi kunuku atkerí resientemente. Ademas di supervisá e maneho operativo di e parkenan, Kalli lo ta responsabel pa kapasitashon i guia e personal senior, desaroyo di kapasidat, representashon i relashon ku stakeholdernan.

Kalli a biba i traha na Bonaire pa mas ku trinta aña i tin un tesoro di eksperensia den konservashon i maneho di naturalesa. El a traha na STINAPA pa promé biaha na 1991 ora el a krea i manehá e Parke Marino di Boneiru ku el a dirigí pa mas di un dékada. Su eksperensia den maneho di konservashon ta inkluí trabou na paisnan lehano manera Fiji, Indonesia i Repúblika di Seychelles. Mas serka di kas, Kalli a sigui su enfoke riba trabou di konservashon di naturalesa ku Dutch Caribbean Nature Alliance, un ret regional di kontakto di organisashonnan di maneho di área protehá, ku el a krea na 2004 i a dirigí pa 13 aña. Mas resien, Kalli a dirigí su mes kompania independiente di “consultant”, Nature2.

Kalli a anunsiá: “Ami ta kontentu di por ta bèk na STINAPA i mi ta ansioso pa enfrentá e reto nobo akí. Miéntras Boneiru ta sigui krese, e preshon riba nos medioambiente ta oumentá dia pa dia, pero kisas nos reto mas grandi ta ku Boneiru ta asina chikitu ku tur parti di nos isla ta parti di e “zona di kosta”. Ku e menasa di kambio di klima ku ta birando mas i mas real, awor ta tempu pa garantisá ku Boneiru ta mas resiliente posibel na kambio. Esaki ta nifiká, promé ku tur kos, fortalesé nos parkenan i hasi e mihó trabou posibel pa protehá e diversidat riku di bida ku nos tin riba tera, na kosta i den laman.

Su kontrapartida, Direktor Finansiero, Kerenza Rannou, lo keda enkargá ku atministrashon finansiero, ofisina DI STINAPA i pa awó e departamentonan di Komunikashon i di Edukashon.

Direktiva di STINAPA ta partisipá tambe ku a kontratá Arantza Jansen komo Konsehero di Rekurso Humano. Arantza a muda pa Bonaire resientemente. E tin un título di BSc. den Trabou Sosial di Universidat di Kòrsou, ku el a finalisá na yüni 2018, spesialisá den Maneho di Rekurso Humano. Mas resien, el a traha pa Laboratorio de Médicos na Kòrsou.

Stimulá kresementu

Ku e fortifikashon akí di e tim di maneho di STINAPA, nos ta spera di stimulá un kresementu positivo di e organisashon. Nos enfoke ta pa tin un ekipo fabuloso, pa sigurá ku nos esfuersonan di konservashon ta eksitoso i ku nos parkenan ta manehá efisientemente. Nos ke gradisí nos tim di STINAPA, nos “stakeholdernan” i Gobièrnu di Bonaire pa nan sosten kontinuo i nos tin gana di por sigui maneha i konservá e parkenan pa e isla di Boneiru.