Kralendijk- E kaminda temporal ku Entidat Públiko Boneiru (EPB) aña pasá a konstruí pa yuda outomobilista desvia for di kaminda pa no mester pasa den e awa salu ku ta subi tera, den simannan tras di lomba poko poko a wòrdu konbertí den un área pa stashoná outo bandi di Harbour Village Resort.

E pregunta grandi ta awor, unda tráfiko lo pasa, ora laman ta bolbes subi tera den e á konserní. Un situashon ku por repití na kalke momentu.

Manera ta e kaso hopi biaha na Boneiru, ta reina un kietut total rondó di e situashon deplorabel riba Kaminda Gobernador Debrot ku no ta un bista pa turista, pero tambe un situashon hopi inkomodo pa doño di outo ku no ke pasa ku nan outo den awa di laman.

Plan

Ya pa vários aña tin diferente plan riba mesa kon pa remediá e situashon di forma struktural. Lástimamente mester bisa ku memoria di polítiko riba nos isla ta hopi kòrtiku. Na momentu ku laman no ta subiendo tera den e área konserní ta lubidá ku tin un problema. Asina ku awa ta bolbe kuminsá subi tera, gobièrnu i Konseho Insular ta man na kabes atrobe i ta kore kabes di gai pa buska solushon.

Daño

Dor di desishon di e doñonan di e tereno pa konstruí lugá di parkeer, no tin ni e opshon mas pa tráfiko desvia for di kaminda prinsipal pa asina evadí e awa salu, ku sigur ta dañino pa e vehíkulonan konserní ku ta pasa dor di dje. Mester tuma no kuenta ku Kaya Gobernador Debrot ta un di nos kareteranan prinsipal, ku ta kondusí por ehèmpel di aeropuerto te na mayoria di e hotèlnan riba nos isla.