Kralendijk – Hendenan ku tabatin kontakto estrecho ku un persona ku ta kontagiá ku e vírùs di corona, for di djabièrnè 21 di mei 2021 ta haña e konseho pa bai sinku dia den karentena. Asina e departamento di Salubridat Públiko ta laga sa. E konseho ta pa e di sinku dia hasi un tèst di PCR na e kaya di tèst di e departamento. Si un hende no ke hasi un tèst e di sinku dia su karentena ta dura dies dia.

Personanan ku a bakuná kompletamente no mester bai den karentena. Sí nan mester hasi un tèst di PCR e di sinku dia. E hendenan ku tèst negativo e di sinku dia, sinku dia despues mester ta kouteloso sí i no bai den serkania di hende ku un salú vulnerabel.

RIVM

Te ku awor tabata konta un karentena di kas di dies dia pa hendenan ku tabatin kontakto estrecho ku un persona ku ta kontagiá ku e vírùs di corona. E regla di karentena nobo di sinku dia ta pas den e reglanan di Rijks Instituut voor Volksgezondheid en Milieu, RIVM.  Pa hendenan ku ta biba òf traha den un institushon ku personanan vulnerabel, e regla di sinku dia no ta konta. Den e situashon ei, protekshon èkstra ta nesesario.

Hendenan ku ta den karentena awor por tuma kontakto ku Salubridat Públiko via 0800 0800 pa puntra kua regla ta konta pa nan. Pa tur hende den karentena ketu bai ta konta ku nan mester registrá pa un tèst si nan tin keho. Pa hendenan ku ta den isolashon pasobra nan a tèst positivo, nada no ta kambia awor. Gezaghèber Edison Rijna ta haña bon ku tin regla nobo pa karentena na kas. ,,Pa hendenan ku mester bai den karentena ta bon ku e periodo ta mas kòrtiku. Nan por reanudá nan trabou i nan bida mas rápido. Awor ku mas i mas hende ta bakuná, e kantidat di kontagio ta baha i ta bira mas seif pa tur hende,” asina gezaghèber a deklará.