KRALENDIJK/WILLEMSTAD – Djarason mainta 10’or e Kaso Sumario ku e empresa Colombiano Servicios Panamericanos Aéreos S.A.A. (Sarpa), huntu ku Fundashon Mariadal (FM), a entamá kontra minister di Tráfiko, Transporte i Planifikashonn Urbano, Charles Cooper i Dutch Caribean Air Services Provider (DC-ANSP) ta bai dilanti.

Mediante e Kaso Sumario demandantenan ke imponé via Korte den Promé Instansia ku ta tuma un areglo temporal ora ta trata e pèrmit pa por bula entre e islanan tambe, na momento ku  mester ehersé buelonan di ambulans. Segun Sarpa i FM Cooper ta retené inhustamente e pèrmitnan nesesario pa esaki, mientras ku pa e motibu ei DC-ANSP tambe ta nenga di duna servisio na Sarpa.

Di su banda minister Cooper a mustra diferente biaha kaba riba e echo ku Sarpa simplemente no tin e pèrmitnan nesesario i e protokòl vigente entre Kòrsou i Colombia tokante tráfiko aéreo tampoko no ta proveé den esei. Ademas Cooper ta mustra riba e echo ku tin por lo ménos un provedor lokal di e asina yamá buelonan Ambulans Aéreo i ku p’esei no tin nesesidat tampoko pa konsedé e asina yamá di shete derechi di libertat, ku mester pa e buelonan ei.

Nan mes falta

Tambe Cooper ta di opinion ku no ta e, sino Fundashon Mariadal a aktua kuestionabel i konsientemente a hiba e asuntu muchu leu. E minister a indiká  ku a mustra tantu Sarpa komo Fundashon Mariadal ku lo no pèrmití e struktura ku nan tin den mente.

 Komo apoderado di e demandantenan lo fungi e abogadonan Wijnand i Woudstra di HBN Law, mientras ku e hurista Giselle Hollander lo representá Pais Kòrsou.