Konstrukshon rotònde Kaya Amsterdam ta kuminsá di nobo

Kralendijk -E rotònde ku ta den konstrukshon aworakí na Kaya Amsterdam, no ta kumpliendo ku tur eksigensia i pesei mester bai wòrdu konstruí totalmente di nobo.

Segun un komunikado di parti di gobièrnu adaptashonnan ta nesesario pa un rotònde seif ku ta duradero pa futuro. Ku bista riba ekspanshon di e bario residensial Hato, e parke empresarial nobo i e posibel haf di kònteiner, un rotònde mas grandi ta nesesario.

Konstrukshon di e rotònde ta parti di un ‘Programa di Kaminda’ mas grandi ku Ministerio di Infrastruktura i Maneho di Awa ta finansiá pa un gran parti. Durante e simannan binidero  ya kaba ta kuminsá ku kuater proyekto di kaminda:

Kaya Commerce: inisio na luna di aprel 2021, Kaya Gramel: inisio na luna di mei 2021, Kaya Hermandad: inisio na luna di mei 2021 i Kaya Neerlandia: inisio na luna di yüni 2021

Diseño

Durante e konferensia di prensa a splika ku na aña 2019 a traha un diseño pa un rotònde na Kaya Amsterdam. Pa motibu ku e diseño aki no tabata tene sufisiente kuenta ku e infrastruktura di WEB ku tin na e sitio ei, Entidat Públiko Boneiru a adaptá e diseño. A marka e diseño riba un pida tereno kaminda a hasi kareda di prueba ku trùk grandi pa wak si e rotònde ta sufisiente grandi. E tempu ei a konkluí ku e diseño tabata bon i a kuminsá ku e trabou.

Na luna di desèmber a surgi diskushon tokante e pregunta si e rotònde ku a konstruí lo tabata sufisiente grandi i sufisiente seif. Seguidamente e direktor a para e trabou pa laga hasi investigashon adishonal promé. Rijkswaterstaat a investigá e diseño i e rotònde ku a konstruí pa loke ta trata e aspektonan di manehabilidat i siguridat. Nan a konkluí ku e rotònde ta adekuá sí komo rotònde chikitu den un bario residensial, kaminda lo mester a hasi vários ahuste tékniko sí pa salbaguardiá siguridat (di por ehèmpel siklista) i kaminda a sali for di e punto di bista ku ta solamente shofùrnan di trùk eksperensiá lo por a pasa ku koutela ku nan trùk riba e rotònde.

Banda di e konklushon aki e ora ei a wak e sitio i e deseonan di término largu di e kaminda aki di nobo.  Pa motibu ku e kaminda aki ta bira un kaminda prinsipal importante pa Boneiru, riba término un rotònde chikitu no ta  kumpli ku e eksigensianan al respekto.

Norma

Pa e motibu aki a skohe pa laga traha un diseño adaptá. E diseño akí ta konsistí di un rotònde mas grandi ku tres brasa, ku ta kumpli ku tur norma hulandes vigente i kaminda ta tene bon kuenta ku infrastruktura di WEB i siguridat di tur tráfiko (inkluso siklista). Mas ku den pasado, pa tur próksimo proyekto di kaminda lo tin atenshon pa asuntunan manera norma infrastruktural, desagwe i (kaminda ta posibel) kaminda pa siklista i peaton.

Na e momentu aki ta investigá kiko ta e gastu adishonal pa konstrukshon di un rotònde nobo i di ki manera ta bai finansiá e gastu adishonal aki. Tambe a kuminsá ku un investigashon atministrativo pa loke ta trata e proseso ku a sigui pa yega na e rotònde aktual. E meta ta pa determiná kiko no a bai bon i pa siña di esaki pa futuro.