KRALENDIJK – Djaweps 30 di novèmber Instituto Hudisial Hulanda Karibense (JICN) ta organisá su Marshe i Expo anual. Tur hende na Boneiru ta bonbiní pa sera konosí ku e kreashonnan trahá na man dor di e detenidonan. E marshe, ku un tempu a kuminsá komo un eksposishon chikí di pintura, mientrastantu a krese bira un evento animá ku un variedat grandi di produkto.

E aña aki ta spesial, pasobra director Wibo de Vries i kordinadó di orientashon laboral  Karel Martis ta embolbí pa último biaha den e organisashon. Desde 2013 nan a traha ku hopi dedikashon na e marshe i e Expo, di manera ku e evento a bira un fenómeno konosí den region. Spesial ta ku e aña aki e prizòn di Kòrsou tambe ta partisipá, loke ta pèrkurá pa mas produkto úniko i un bunita koperashon entre e prizònnan. 

Na e marshe bishitantenan por skohe for di un oferta variá di obranan trahá na man. Tin muebles, kuadro-, prenda-, ko’i hunga i asta matanan na benta. Trabou na midí tambe ta posibel: detenidonan ta traha riba pedido por ehèmpel porta di kurá, kouchi pa kachó i otro produkto personalisá. E detenidonan ta traha tur kos minusiosamente i ku profeshonalismo komo parti di e programa “Ban pa kambio”. E programa aki ta yuda nan ku kurso i eksperensia di trabou, di manera ku despues di nan detenshon nan por regresá mihó den komunidat.

E suma rekoudá na e marshe ta bai pa material nobo pa e tayernan, di manera ku e detenidonan por sigui desaroyá nan abilidatnan. 

Bini 30 di novèmber 2024 entre 10’or di mainta i 4’or di atardi na e tereno di JICN na Plantashi Aruba i sostené re-integrashon di detenidonan. Deskubrí produktonan úniko i kontribuí na nan futuro. Pa pedidonan na midí bo por kuminsá tuma kontakto via [email protected].