KRALENDIJK – A drenta diferente inskripshon pa e destaho públiko di un terminal nobo ku Bonaire Bon Transition lo bai realisá. Esei e kompania ta skirbi den su boletin informativo mas resien. Aktualmente ta evaluando e inskripshonnan a base di kriterianan ku a stipulá delantá. Ta spera e selekshon di e ofresedó ganadó pa fin di e aña aki.

E destaho públiko ta habrí pa kompanianan ku eksperensia den diseño di detaye i konstrukshon di terminalnan di kombustibel moderno. Den e  prosedura di selekshon ta pone atenshon ampliamente na medidanan di seguridat i aspektonan di durabilidat. Ta enkurashá partidonan ku ta inskribí pa traha mas tantu ku ta posibel ku kompanianan lokal. 

Nesesidat 

Un terminal nobo pa kombustibel pa uso lokal, tráfiko aereo i produkshon di energia lokal ta nesesario, mirando ku e sitionan di almasenahe a bira bieu. Esaki ta trese riesgo pa hende, bestia i medio ambiente. 

Apesar ku a komprometé pa energia renovabel, ta keda e nesesidat pa almasenahe seif pa kombustibel. Den futuro por almasená kombustibel bio tambe den e terminal.