Kralendijk- Segun miembro di Konseho Insular pa Partido Demokrat, Michael Pieters, e situashon na Jachthaven ta duna e imprenshon ku ta kargando awa hiba laman.Segun Pieters, ela tuma nota di e trabounan ku ta tumando lugá riba e kaya Gobernador Debrot na altura di Jachthaven kaminda tin un situashon di awa di laman ku ta subi kaya poniendo ku outomiobilistanan tin basta problema ku e situashon aki.

E awa di laman ku ta subiendo kaya, depende e situashon di naturalesa di ‘eb’ i ‘vloed’ i tambe ora di yobida di awa ta krea un sitashon di desgusto serka outomobilistanan pasombra e awa salu di laman ta bai riba e outonan ku ta trafiká riba e kaya ku tur e konsekwensianan negativo ku esaki por tin pa e vehíkulonan.Pieters ta sigi bisa ku e ta na altura ku tabatin un plan pa renova Kaya Gobernador Debrot for di banko Maduro na Playa te na e rotonde konosí komo rotonde di Sunset Beach.Dado momentu, gobièrnu a disidí di separá e proyekto aki i ehekutá e parti di kaya na altura di Jachthaven pasombra esaki tabata mas urgente.

Brùg

Esaki ta tumando lugá na e momentunan aki kaminda riba instrukshon di gobièrnu a disidí di pone klinker riba e kaya. Pero e situashon di e awa di laman ku ta subi kaya lo no keda solushoná segun Michael Pieters. Segun Michael Pieters, na su pareser, ta un subida di e kaya mester tuma lugá den forma di un brùg pa asina solushoná e problema di awa di laman ku ta subi kaya i hasi daño grandi na nos vehíkulonan ku ta trafiká riba e kaya aki.

Mas alew Pieters ta bisa ku den e kaso aki ta parse ku gobièrnu ta hasiendo nèt kontrali, esta hisa laman trese tera.“Kualkier persona ku no tin tinu di konstrukshon di kaya mes por mira ku e loke ku nan ta bezig kuné lo no solushoná e situashon i mas bien ta un derochamentu di plaka sin krea e solushon rekerí”, Pieters ta bisa.

Pregunta

Finalmente Michael Pieters ta bisa ku den reunion públiko di otro siman e lo hasi algun pregunta na gobièrnu tokante e situashon na Kaya Gobernador Debrot na altura di Jachthaven pa asina tur outomobilista por sa ta kiko realmente ta e intenshon di gobièrnu i kon finalmente gobièrnu tin pensá pa solushoná e situashon aki pa duna un alivio a largo plaso.