KRALENDIJK- Movementu di Pueblo Boneriano (MPB) ta pro un sistema di deposito (statiegeld) pa bòter, pa eviáa ku esakinan despues di uso ta keda bentá den mondi. 

Miembro di Konseho Insular, Din Domacassé e siman aki a presentá un moshon den Konseho Insular pa hasi un apelashon riba Kolegio Ehekutivo pa studia kon lo por yega na esaki. 

E idea di un sistema di depósito no ta nobo na nos islanan. Antes, voral den temporada ku Amstel tabata produsí serbes ainda na Kòrsou, tabata tin un sistema di depósito kaba. Hendenan ku ker a kumpra un kaha di serbes mester a entregá sea un kaha yen di bòter bashí òf paga un depósito adishonal na momento ku no tabata entregá un kaha bieu ora di kumpra un kaha nobo. 

Mondi

Despues ku a kita e sistema di depósito por a nota ku muchu mas bòter bashí a bin resultá den naturaleza. Aunke ku awendia tin vários konteiner di Selibon kaminda ku por depositá bòter bashi pa por wòrdu resiklá, hopi hende no ta tuma e molèster di bai entrega esakinan. 

Bòter bashí por wòrdu resiklá dor di krùsh esakinan pa generá un tipo di santu ku por usa pa traha blòki òf -si laga e pidanan mas grandi- komo piedra decoratívo pa baki di mata.