KRALENDIJK- Den e boletin informativo special, Fondo di Penshun Karibe Hulandes (PCN), ta splika kon nan ta invertí di un manera responsabel, ku enfoke riba sostenibilidat i kontribushonnan sosial. 

PCN a adaptá su maneho riba e punto aki entre otro despues di un sondeo bou di su partisipantenan, kendenan a indiká ku nan ta haña importante ku nan fondo di penshun ta invertí di un manera sosialmente responsabel. 

Na momentu di evaluá invershon, PCN ta konsiderá e kriterionan ku ta wòrdu indiká ku e abreviashon ESG, ku ta representá atenshon pa medio ambiente, impakto sosial, i kalidat di maneho di empresa. 

Lokal

PCN ta bisa ku nan ta keda invertí pa logra e rendimentu finansiero mas bon posibel, pero minimalisá e invershon den empresanan ku ta skor malu riba durabilidat. 

Ora di hasi Invershon na Boneiru, St. Eustatius i Saba tambe PCN ta tene kuenta ku e kriterionan menshoná.