Kralendijk- For di dia 8 di ougùstùs 2021 biaheronan mester hasi e tèst di NAAT (PCR) 48 ora promé ku sali bin Boneiru for di eksterior. Anteriormente tabatin mag di hasi e tèst 72 ora promé ku yegada. Te ainda biaheronan no bakuná òf no kompletamente bakuná for di un pais di riesgo haltu òf hopi haltu mester hasi un tèst antígeno tambe, direktamente na yegada na Boneiru.

Ta posibel ainda pa biaheronan hasi un tèst di NAAT (PCR) 24 ora promé ku salida. Den kaso di un tèst di 24 ora promé ku salida, biaheronan no tin mester di hasi un tèst antigéniko na yegada.

Tur biahero for di un pais di riesgo hopi haltu mester hasi tèst tambe riba e di 5 dia despues di nan yegada na Boneiru. Ta traha e sita pa tèst asina ku e biahero yega Boneiru. Ta adaptá e kondishonnan pa biaha pa Boneiru ora esei ta nesesario. Pa e situashon mas aktual wak riba www.bonairecrisis.com.

Bùbel

Te asina leu biaheronan ful bakuná ku ta yega Boneiru for di Kòrsou òf Aruba, no mester hasi PCR tèst. Biaheronan ku ta biaha bai Aruba si mester hasi PCR tèst, sea promé ku salida òf na yegada na Aruba. Pasaheronan no (ful) bakuná semper mester hasi PCR/NAAT tèst, tambe ora na bula pa Kòrsou.