KRALENDIJK- Partido Demokrátiko Bonereriano (PDB) a lanta un komishon di tres persona pa bai hiba kombersashon ku otro partido pa papia tokante formashon di un koalishon pan nombre Kolgio Ehekutvo. 

“Komo partido ku e sifra di voto total mas grandi, Demokrat ta mir’e komo su responsabilidat pa tuma e inisiativa pa entamá sondeonan ku tur diferente partido ku lo forma frakshonan den Konseho Insular nobo”, asina e partido a bisa den un komunikado ku a saka djasabra atardi. 

Meta di e kòmbersashonan, segun PDB, ta pa interkambiá ku otro e diferente opinionan ku por tin pa ku próksimo pasonan den formashon di un gobièrnu, i pa determiná kwa mayoria di asiento den Konseho Insular nobo por forma un base stabil di gobernashon ehekutivo nobo, un gobernashon ku ta honra e deseonan ku pueblo a ekspresá na urna.

Komishon

E kominshon di Demokrat ta konsistí di 3 persona, ku ta Ted Rijna, Dudley Wedervoort i Arjen de Wolff. Wederfoort ta e bosero di e kominshon. 

“Demokrat ta di opinion ku pueblo di Boneiru a klaramente ekspresá un deseo pa kambio. Demokrat lo konsiderá un apelashon pa forma parti di un futuro koalishon i Kolegio Ehekutivo nobo solamente ora Demokrat ta konvensí ku nos por realisá e kambio pa un Boneiru mas hustu i mas duradero” asina e komumikado di PDB ta konkluí.