Kralendijk – Awe, djasabra 20 di mart empleadonan di enseñansi i parti di esnan ku ta traha den akohida di mucha, a haña nan promé angua kontra Corona. Despues di fakansi di Pasku di Resurekshon, djaluna 12 di aprel, ta asina leu ku tur a haña nan di dos angua.

E desishon pa awor aki bakuná e grupo akí tambe ta bini entre otro pa motibu di seramentu di skol i akohida pa mucha regular komo konsekuensia di lock-down. E konsekuensianan negativo di esaki riba bienestar di mucha, mayor/kuidadó i komunidat ta grandi. Pasamentu di angua pa personal den enseñansa i trahadonan na akohida di mucha ta sosodé pareu ku pasamentu di angua pa personal den kuido i hendenan riba 60 aña. Di e gruponan akí kasi tres kuart a registrá awor.

Mas seif

Bakunashon di personal den kuido i trahadónan na akohida pa mucha ta kontribuí na un ambiente di skol mas seif, ménos profeshonal ta bira malu i kontinuidat den akohida pa mucha vulnerabel. Segun RIVM ún te dos siman despues di e promé angua, 60-90% di hende ta protehá kontra e vírùs di corona. Tin un chèns chikitu ku bo ta hañ’é ainda i mayoria biaha bo ta bira ménos malu. E chèns ku bo ta haña corona despues di e dos angua ta hopi chikitu, pero no sero. Tampoko no ta konosí ainda ku bo por transmití e vírùs di corona. P’esei por lo pronto ta konta pa hendenan ku a bakuná mesun reglanan di corona ku ta konta pa hendenan ku no a bakuna. Departamento di Salubridat Públiko ta den konsulta ku ministerio di VWS tokante entrega di bakuna èkstra. Si bai di akuerdo ku esaki, ta bini mas espasio pa hisa e kantidat di bakunashon pa dia i pa bai pasa un otro grupo di enfoke urgente angua. Ta bai por ehèmpel pa trahadónan den vèlt di profeshonnan vital manera polis i mantenshon, brantwer i mareshosé.