KRALENDIJK – Komienso di e siman aki, Qredits a kuminsá ku e programa ‘BeYourOwnBoss’ pa estudiantenan di MBO na Boneiru.

Dieskuater studiante di diferente disiplina ta partisipá den e programa aki, ku e meta pa siña mas tokante lantamentu di negoshi. Desaroyá pa Qredits, e programa ta ofresé studiantenan e oportunidat pa desaroyá habilidatnan empresarial i traha riba un idea di negoshi usando un ‘Business Model Canvas’.

E klasnan, dirigi pa e kouch di Qredits Daimandra Frans, kende tambe ta un doño di negoshi su mes, ta kubri diferente aspekto di empresarialidat, manera identifikashon di kalidatnan empresarial, análisis di konkurensia, i planifikashon finansiero.

Realisashon di soñonan

E programa ta dura 8 siman i lo tuma lugá na Qredits despues di oranan di skol i di stage. E programa ‘BeYourOwnBoss’ ta brindá studiantenan e oportunidat pa realisá nan soñonan empresarial, ku sosten di Qredits i otro finansiadónan.